Pensiyaçılara XƏBƏRDARLIQ: 100-200 manat təklif edirlər…

Son dövrlər yaşlı və pensiyaçı vətəndaşlara müəyyən məbləğdə pul təklif edilərək onların adına bank kartlarının açdırılması halları diqqət çəkir. Bu kartlardan qanunsuz pul dövriyyəsi, dələduzluq və digər maliyyə cinayətlərində istifadə olunması isə kart sahibinin hüquqi məsuliyyəti məsələsini gündəmə gətirir. Xüsusilə, vətəndaşın kartının hansı məqsədlə istifadə edildiyindən xəbərsiz olması, onun cinayət məsuliyyətinə cəlb edilib-edilməyəcəyi və özünü hüquqi baxımdan necə müdafiə edə biləcəyi mühüm əhəmiyyət daşıyır.

Bəs, öz adına açılmış bank kartının qanunsuz maliyyə əməliyyatlarında istifadə olunmasından xəbərsiz olan şəxs də cinayət məsuliyyəti daşıya bilərmi? Belə hallarda kart sahibinin məsuliyyəti hansı meyarlarla müəyyən edilir və vətəndaşlar hüquqlarını qorumaq üçün ilk növbədə hansı addımları atmalıdırlar?
Mövzu ilə bağlı Sonxeber.az-a açıqlama verən vəkil Əkrəm Həsənov bildirib ki, başqasının əmlakından qanunsuz istifadə edilməsi, onun etibarından sui-istifadə edilərək pensiya və ya digər bank kartının ələ keçirilməsi və qanunsuz əməliyyatlarda istifadə olunması ən azı dələduzluq əlamətləri yaradır.

"Lakin həmin kart vasitəsilə hansısa başqa cinayət törədilərsə, kartdan istifadə edən şəxs həmin əməllərə görə də ayrıca məsuliyyət daşıyır. Məsələn, çirkli pulların yuyulması, kibercinayətkarlıq və ya terrorçuluğun maliyyələşdirilməsi kimi əməllərə yol verilərsə, şəxs törətdiyi cinayətlərə uyğun məsuliyyətə cəlb oluna bilər. Kartından istifadə edilən vətəndaşa gəldikdə isə, əgər onun baş verənlərdən məlumatlı olduğu sübuta yetirilməzsə, yəni özü də aldadılıbsa, bu halda onun məsuliyyəti yaranmır. Bununla belə, vətəndaşlar bank kartlarını başqalarına verərkən ehtiyatlı olmalıdırlar. Nəzərə almaq lazımdır ki, hüquq-mühafizə orqanları şəxsin təqsirini sübut etməlidir. Lakin praktikada bəzən vətəndaşdan da baş verənlərdən xəbərsiz olduğunu və cinayətə ortaq olmadığını izah etməsi tələb olunur. Bu baxımdan, hər kəs bank kartlarının təhlükəsizliyinə diqqət yetirməli, onları başqa şəxslərin istifadəsinə verməməlidir".

Röyalə Xəyal

Telegramda izləyin