"Bütün qərarlar və atılan addımlar insanların sosial rifahının artmasına xidmət edir" - Emil Əkbərov

"Cənab Prezident İlham Əliyevin əhalinin yaşayışının yaxşılaşdırılması ilə bağlı imzaladığı son fərman və sərəncamlar bu istiqamətdə, xüsusilə son illərdə ardıcıl, geniş miqyas alan sosial islahatların növbəti mərhələsinə başlanmasını təmin etdi".

Bunu Sonxeber.az-a açıqlamasında "BİG Media" MMC-nin direktoru Emil Akbarov deyib.

O, qeyd edib ki, Prezident İlham Əliyevin 17 dekabr 2021-ci il tarixdə imzaladığı sərəncamla minimum aylıq əməkhaqqının məbləği 250 manatdan 300 manata çatdırıldı:

"Bu artım dövlət sektoru üzrə 400 min, özəl sektor üzrə 400 min nəfər olmaqla, ümumən 800 min işçini əhatə edəcək. Yeni ildən tətbiq ediləcək bu artımlar 2,1 milyondan çox şəxsə şamil ediləcək. Əhalinin sosial rifahının yaxşılaşdırılması istiqamətində atılacaq bu addımlar üçün 1,5 milyard manat vəsait nəzərdə tutulub. Bilirsiniz, bu, ilk artım deyil. Belə ki, bu istiqamətdə ciddi irəliləyişlər əldə edilib, əhalinin sosial müdafiəsinin gücləndirilməsi, sosial ödənişlərin, əməkhaqlarının artırılması istiqamətində ardıcıl işlər görülür.

Son üç ildə minimum aylıq əməkhaqqı 2-3 dəfə artırılaraq, 130 manatdan 300 manata çatdırılıb. Minimum əmək haqqı artımı əhalinin gəlirlərində artımı təmin etməklə, işçi qüvvəsinin rəqabət qabiliyyətinin, əmək məhsuldarlığının artmasını stimullaşdırır. Cənab Prezidentin imzaladığı son fərman və sərəncamlar bir daha sübut etdi ki, əhalinin sosial müdafiəsinin gücləndirilməsi, onların gəlirlərinin artırılması dövlətimizin siyasətində önəmli yer tutur. Hesab edirəm ki, bütün qərarlar və atılan addımlar insanların sosial rifahının artmasına xidmət edir. Həmçinin, bu sahədə atılan mütərəqqi addımlar Azərbaycan vətəndaşının maraqlarının dövlətin həyata keçirdiyi siyasətin mərkəzində dayandığını bir daha təsdiqləyir".

Emil Akbarov vurğulayıb ki, bu sərəncam elm, təhsil, səhiyyə, sosial müdafiə və sosial təminat, mədəniyyət, idman, kənd təsərrüfatı, ekologiya, ətraf mühit və digər sahələrdə çalışan on minlərlə şəxsin əməkhaqlarının artırılmasına öz təsirini gösətərəcək:

"Minimum aylıq əmək haqqının gözlənilən artımı aztəminatlı ailələrin, ictimai və sosial işlərdə çalışanların həyat şəraitini yaxşılaşdıracaq. İnsan amili, vətəndaşların sosial rifahının yüksəldilməsi dövlətimizin başçısının həyat amalıdır və bu, imzalanan sərəncamlarda da öz əksini tapır. Cənab Prezident bütün varlığı ilə Azərbaycan xalqının xoşbəxt gələcəyinə, dövlətimizin inkişafına və beynəlxalq aləmdə tanınmasına çalışır. İmzalanan sosial sərəncamlar və həyata keçirilən çox mühüm layihələr bunun parlaq nümunəsidir. Hesab edirəm ki, əhalinin sosial rifahının yaxşılaşdırılması istiqamətində qəbul edilən bu qərarlar insanların gəlirlərinin, alıcılıq qabiliyyətinin artmasına xidmət edəcək".

Aysel Yusifqızı

Telegramda izləyin