Qurbanı kəsilməyən, döyüşün bitməsinə 30 dəqiqə qalmış şəhid olan Nicatı siz də tanıyın-FOTO

44 günlük Vətən müharibəsində bizə öz canı bahasına qələbə bəxş edənlərdən biri də Tarıverdiyev Nicat Şöhrət oğludur.

Sonxeber.az xəbər verir ki, o, müharibənin bitməsinə 30 dəqiqə qalmış şəhadətə ucalıb.

17 noyabr 1998-ci il tarixdə Şamaxıda doğulan Nicat 9 noyabr 2020-ci ildə Ağdərə istiqamətində şəhadətə ucalıb.

Evin tək oğlu olan şəhid Nicat anası Şükran xanım ilə son danışıqda "Hər şey yaxşı olacaq, darıxma. Oradakılara da de, darıxmasınlar" deyib.

Şəhidimizin atası Şöhrət bəy və anası Nicatın gəlməsi və torpaqlarımızın azad olunması münasibəti ilə qurban kəsməyi niyyət ediblər.

Ananın sözlərinə görə, qurban kəsdikləri zaman hərbi prokurorluqdan zəng gəlib. Şükran xanıma deyilən "Sizin oğlunuz qəhrəmandır" cümləsi və oğlunun şəhadət xəbəri ananı göz yaşlarına boğub.

Nicat 16 noyabr 2020-ci il tarixində İkinci Fəxri xiyabanda dəfn edilib.

Ölümündən sonra o, "Vətən uğrunda", "Cəsur döyüşcü" və "Suqovuşanın azad olunmasına görə" medalları ilə təltif olunub.

Şamaxı Şəhəri Dədəgünəşli kəndində şəhidimizin adına bulaq inşa edilib.

ZAİRA AKİFQIZI

Telegramda izləyin