Ərdoğandan Sezen Aksu açıqlaması

Türkiyə Prezidenti Rəcəb Tayyib Ərdoğan bir neçə gün əvvəl Böyük Çamlıca məscidində qılınan namazdan sonra çıxışında səsləndirdiyi "Həzrəti Adəmə uzanan dilləri qoparmaq bizim borcumuzdur" ifadəsinə aydınlıq gətirib.

Axşam.az xəbər verir ki, NTV kanalına müsahibə verən Ərdoğan həmin sözləri müğənni Sezen Aksuya şamil etmədiyini bildirib:

"Burada çox aydın həqiqəti açmaqda fayda var. Mənim orada xitab etdiyim şəxs Sezen Aksu deyil. O, ölkəmizin mühüm sənətçilərindən biridir. Amma digər tərəfdən ölkənin prezidenti olaraq, hansı inancdan olursa-olsun insanlarımızın dini dəyərlərinə toxunulmasına icazə vermərəm. Xalqımızın müqəddəslərinə həssas yanaşıram. "Dilini qoparmaq" ifadəsini bir nəfərə yox, müqəddəslərə təhqir ünvanlayanlara qarşı işlətmişəm. Millət kimi qardaşcasına və birgə yaşamağımızın rəhni biri-birimizə olan hörmətimizdir, biz bu hörməti göstərməliyik".

Qeyd edək ki, müğənni Sezen Aksunun "Şahane bir şey yaşamaq" adlı mahnısındakı "Salam söyləyin o cahil Həvva ilə Adəmə" ifadəsi insanlar arasında böyük narazılığa səbəb olmuşdu.

Telegramda izləyin