Bakıda mənzil qiymətləri: 2026-cı ildə qiymətlər artacaq, yoxsa düşəcək?

Bakıda mənzil qiymətlərinin artması 2026-cı ildə də daşınmaz əmlak bazarının əsas müzakirə mövzularından biridir. Mənzilə tələbat, tikinti xərcləri, yeni layihələrin sayı, ipoteka imkanları və alıcılıq qabiliyyəti qiymətlərin gələcək istiqamətinə təsir edən əsas amillər sırasındadır. Qiymət artımının davam edib-etməyəcəyi, yoxsa bazarda ucuzlaşma və sabitləşmə müşahidə olunacağı həm ev almaq istəyənləri, həm də əmlaka investisiya yatıranları maraqlandırır.

Bəs, 2026-cı ilin qalan dövründə Bakıda mənzil qiymətlərinin artması, yoxsa ucuzlaşması gözlənilir? Qiymət dəyişikliklərinə hansı iqtisadi amillər təsir göstərəcək, yeni və köhnə tikililərdə vəziyyət necə fərqlənəcək və hazırda mənzil almaq üçün bazarda hansı imkanlar mövcuddur?
Mövzu ilə bağlı Sonxeber.az-a açıqlama verən əmlak məsələləri üzrə ekspert Fərid Cəfərli bildirib ki, 2026-cı ildə Bakı daşınmaz əmlak bazarında mənzil qiymətlərinin ümumi şəkildə aşağı düşməsi ehtimalı yüksək deyil. Bunun bir neçə əsas səbəbi var.

"İlk növbədə, Bakıda tikinti üçün əlverişli torpaq sahələrinin məhdudlaşması, xüsusilə mərkəzi və inkişaf etmiş ərazilərdə torpaq dəyərinin yüksək olması yeni layihələrin maya dəyərinə birbaşa təsir göstərir. Eyni zamanda tikinti materialları, əməkhaqqı, mühəndis-kommunikasiya infrastrukturu və digər istehsal xərcləri də mənzillərin ilkin satış qiymətlərinin formalaşmasında mühüm rol oynayır. Bu baxımdan, tikinti şirkətlərinin mənzilləri kütləvi şəkildə əvvəlki qiymətlərdən daha aşağı təklif etməsi üçün ciddi iqtisadi əsaslar olmalıdır.

Digər mühüm amil tələb və alıcılıq qabiliyyətidir. Bakıya daxili miqrasiya, ailələrin mənzil şəraitini yaxşılaşdırmaq istəyi, yeni ailələrin formalaşması və daşınmaz əmlaka uzunmüddətli investisiya marağı mənzil bazarında tələbi dəstəkləyən amillərdir.

Alıcıların maliyyə imkanları ilə satıcıların tələb etdiyi qiymətlər arasında uyğunsuzluq yarandıqda satış müddəti uzanır, danışıqlar sərtləşir və real satış qiyməti elan qiymətindən aşağı formalaşa bilir. Bu proses qiymətlərin ümumi şəkildə azalmasından daha çox bazarın öz daxilində korreksiya olunması kimi qiymətləndirilməlidir.

2026-cı ilin bazar göstəricilərinə gəldikdə, yeni tikili mənzillər üzrə median qiymət 2 850 manat/kvadratmetr, köhnə tikililər üzrə isə təxminən 2 692 manat/kvadratmetr səviyyəsində qeydə alınıb. Dekabr 2025-ci ilin baza göstəricisi ilə müqayisədə yeni tikililərdə qiymət indeksi 8 faiz, köhnə tikililərdə isə 6,8 faiz yüksəlib.

Bununla yanaşı, qiymət artımının bütün seqmentlərdə eyni sürətlə baş vermədiyini nəzərə almaq lazımdır. Yeni və köhnə tikililər, premium layihələr, eləcə də şəhərətrafı ərazilərdə yerləşən mənzillər fərqli tələb və təklif mexanizmləri əsasında fəaliyyət göstərir.

Proqnozlara görə, 2026-cı ildə keyfiyyətli layihələrdə, əlverişli lokasiyada yerləşən, nəqliyyat və sosial infrastruktura çıxışı olan, tikinti və istismar keyfiyyəti yüksək mənzillərdə qiymət artımı potensialı daha güclü olacaq.

Digər tərəfdən, həddindən artıq yüksək qiymətlə satışa çıxarılan, yerləşməsi və infrastrukturu zəif olan, tikinti keyfiyyəti və hüquqi sənədləşməsi ilə bağlı suallar yaranan obyektlərin satışı çətinləşə bilər. Belə mənzillərin sahibləri qiymət gözləntilərini aşağı salmağa məcbur qala bilərlər. Bu isə Bakı üzrə ümumi qiymət enişi deyil, konkret obyektlərdə bazar korreksiyası deməkdir.

Mənim qənaətimə görə, 2026-cı ilin sonuna qədər Bakı mənzil bazarında əsas ssenari nominal qiymətlərin mülayim artımı və bazarın daha rasional qiymət mexanizminə keçidi olacaq. Kəskin qiymət enişinə səbəb ola biləcək ciddi iqtisadi və maliyyə şoku baş vermədiyi halda, genişmiqyaslı ucuzlaşma gözləmirəm.

Bununla belə, əvvəlki illərdə müşahidə olunan yüksək artım templərinin bütün ərazilərdə və mənzil növlərində təkrarlanacağını da düşünmürəm. Bazar getdikcə daha çox keyfiyyətə, lokasiyaya, hüquqi təhlükəsizliyə və real alıcılıq qabiliyyətinə əsaslanan mərhələyə keçir.

Yekun olaraq, 2026-cı ildə Bakı mənzil bazarında əsas istiqamət ucuzlaşma deyil, seqmentlər üzrə fərqlənən qiymət artımı olacaq. Düzgün lokasiyada yerləşən, keyfiyyətli və real qiymətlə təklif olunan mənzillər dəyərini qoruyaraq artım potensialını saxlaya bilər. Bazar reallığından yüksək qiymətləndirilən obyektlər isə satış çətinliyi ilə üzləşə bilər.

Qarşıdakı dövrdə daşınmaz əmlak bazarında əsas məsələ sadəcə mənzil almaq deyil, düzgün qiymətə, əlverişli lokasiyada və hüquqi baxımdan təhlükəsiz əmlak seçmək olacaq. Bir sözlə, 2026-cı ildə Bakı mənzil bazarında kəskin ucuzlaşma deyil, mülayim bahalaşma, qiymətlərin seqmentlər üzrə fərqlənməsi və daha peşəkar bazar münasibətlərinin formalaşması gözlənilir".

Röyalə Xəyal

Telegramda izləyin