Bakı-Ankara münasibətlərində davamlı dialoqun əhəmiyyəti - AÇIQLAMA

"Münasibətlərin intensivliyi bütün müstəvilərdə, o cümlədən dövlətlərarası əlaqələrdə, adətən müsbət nəticələr verir. Sadə bir deyim var: gediş-gəliş zəifləyəndə doğmalar yadlaşır, gediş-gəliş intensivləşəndə isə yadlar doğmalaşa bilir. Bu yanaşmanı dövlətlərarası münasibətlərə də şamil etmək olar. Xüsusilə Azərbaycan və Türkiyə kimi etnik, milli, dini və tarixi baxımdan çoxsaylı ortaq dəyərlərə malik ölkələr arasında qarşılıqlı səfərlər və təmaslar həmişə müsbət rol oynayıb və belə əlaqələrə ehtiyac var".

Bu fikirləri Sonxeber.az-a açıqlamasında siyasi şərhçi Aydın Quliyev bildirib.

"İki ölkənin xalqları və ayrı-ayrı fərdləri arasında ünsiyyətin özünəməxsus əhəmiyyəti olduğu kimi, dövlət rəsmiləri və dövlət başçıları arasındakı əlaqələr də xüsusi məna daşıyır. Xüsusilə yüksək vəzifəli şəxslərin və dövlət başçılarının təmasları Türkiyə-Azərbaycan münasibətlərinin inkişafında mühüm rol oynayıb.

Dövlət rəsmiləri və ali dövlət təmsilçiləri arasında görüşlər yarana biləcək anlaşılmazlıqların və çətinliklərin aradan qaldırılmasına, gələcək inkişaf istiqamətlərinin və tempinin müəyyənləşdirilməsinə şərait yaradır. Bu təmaslar, həmçinin iki ölkə arasında əməkdaşlığın genişləndirilməsi üçün mövcud potensial imkanları üzə çıxarır. Diplomatik əlaqələr nə qədər intensiv davam edərsə, kənar qüvvələrin bu münasibətlərə zərər vurmaq cəhdlərinin nəticə verməsi də bir o qədər çətinləşər.

Azərbaycan-Türkiyə qardaşlığının dərin tarixi kökləri olsa da, bu münasibətlərdən narahat olan kənar qüvvələrin mövcudluğunu da nəzərə almaq lazımdır. Belə qüvvələrin fürsət əldə etməməsi üçün iki dövlət arasında əlaqələrin və əməkdaşlığın bütün istiqamətlər üzrə intensivliyini və davamlılığını təmin etmək vacibdir.

Azərbaycan-Türkiyə münasibətlərinin inkişafı üçün xüsusi mürəkkəb metodologiyalara ehtiyac yoxdur. Çünki iki ölkənin birliyini möhkəmləndirən humanitar, mədəni və tarixi əsaslar kifayət qədər güclüdür. Belə şəraitdə diplomatların, siyasətçilərin, qeyri-hökumət təşkilatlarının və media nümayəndələrinin təmasları iki ölkə arasındakı münasibətlərin daha da dərinləşməsinə xidmət edir. Buna görə də Türkiyə-Azərbaycan münasibətlərində qarşılıqlı ünsiyyətə və davamlı təmaslara xüsusi önəm verilməlidir".

Röyalə Xəyal

Telegramda izləyin