Sürücülərə kamera nəzarəti qəza riskini azalda bilər? - AÇIQLAMA

Sükan arxasında mobil telefondan istifadə sürücünün diqqətini yayındıraraq yol-nəqliyyat hadisələrinin başvermə riskini artıra bilər. Bu cür halların kameralar vasitəsilə aşkarlanması sürücülərin intizamının gücləndirilməsi və yol hərəkəti qaydalarına əməl olunmasına nəzarətin artırılması baxımından yeni imkanlar yaradır. Bununla yanaşı, görüntülər əsasında cərimə tətbiq edilərkən texniki səhvlərin, yanlış qərarların qarşısının alınması və sürücülərin hüquqlarının qorunması məsələləri də diqqətdə saxlanılmalıdır.

Bəs, sükan arxasında mobil telefondan istifadə edən sürücülərin kameralar vasitəsilə aşkarlanması qəza riskinin azaldılmasına nə dərəcədə kömək edə bilər? Görüntülər əsasında cərimə tətbiq edilərkən yanlış qərarların qarşısını almaq və sürücülərin etiraz hüququnu təmin etmək üçün hansı mexanizmlər nəzərdə tutulmalıdır?
Mövzu ilə bağlı Sonxeber.az-a açıqlama verən nəqliyyat eksperti Aslan Əsədov bildirib ki, sükan arxasında mobil telefondan istifadə edən sürücülərin kameralar vasitəsilə aşkarlanması ilə bağlı mexanizm əvvəllər də mövcud olub və bu hallara görə cərimələr tətbiq edilib.

"Eyni zamanda, təhlükəsizlik kəmərindən istifadə etməmək kimi qayda pozuntularına qarşı da müvafiq tədbirlər görülüb. Bu cür nəzarət mexanizmləri sürücülərin daha məsuliyyətli davranmasına və yol hərəkəti qaydalarına əməl etməsinə xidmət edir. Nəqliyyatın idarə edilməsində əsas prinsiplərdən biri də nəqliyyat axınlarının düzgün tənzimlənməsidir. Buraya yol hərəkəti təhlükəsizliyinin təmin edilməsi, nəqliyyat vasitələrinin hərəkətinin əlaqələndirilməsi və onlardan düzgün istifadə olunması daxildir. Nəqliyyat vasitələrinin və hərəkət axınlarının səmərəli idarə edilməsi, intizamın qorunması və sürücülər arasında koordinasiyanın təmin olunması yol hərəkətinin təşkilinə müsbət təsir göstərir. Bu tədbirlər həm də nəqliyyat axınlarının daha səmərəli idarə olunmasına və ümumi təhlükəsizliyin artırılmasına kömək edə bilər".

Röyalə Xəyal

Telegramda izləyin