Afət Fərmanqızının ərinin həbsinin təfərrüatı: Rüsvayçı mesajlar var - YENİLƏNİB + VİDEO

Müğənni Afət Fərmanqızının əri Mamed Nanazanovun həbsi ilə bağlı yeni təfərrüat məlum olub.

Oxu.Az-ın əldə etdiyi məlumata görə, tərəflər arasında sonuncu insident Xəzər rayonu, Mərdəkan qəsəbəsində yerləşən çay evində baş verib. Orada M.Nanacanov Sumqayıt şəhər sakini Vaqif İsayevi külqabı ilə vuraraq ona xəsarət yetirib.

Bundan başqa məlum olub ki, Nanacanovun İsayevi hədələməsi ilə bağlı konkret təkzibedilməz sübutlar var. Belə ki, Nanacanov İsayevə müxtəlif vaxtlarda SMS mesajlar yazaraq 200 min dolları verməyəcəyi təqdirdə onu və ailə üzvlərini öldürəcəyini, habelə başlarına rüsvayçı hadisələr gətirəcəyini bildirib, zərərçəkən şəxsi ağır söyüşlərlə təhqir edib.

11:55
Afət Fərmanqızının həyat yoldaşı iki maddə üzrə təqsirli bilinir.

Lent.az-ın məlumatına görə, Mamed Nanacanov Cinayət Məcəlləsinin 182-ci (hədə-qorxu ilə tələb etmə) və 221.3-cü (Xuliqanlıq; silahdan istifadə edilməklə törədildikdə, yaxud özgənin əmlakının məhv edilməsi və ya zədələnməsi ilə müşayiət olunduqda) maddələri ilə ittiham olunur.

O, yanvarın 31-i səhər saatlarında Xəzər rayon Polis İdarəsi tərəfindən saxlanılaraq istintaqa cəlb edilib.

Xəzər rayon Məhkəməsinin qərarı ilə M. Nanacanov barəsində həbs qətimkan tədbiri seçilib.

11:15

Müğənni Afət Fərmanqızının həyat yoldaşının polis tərəfindən saxlanılmasının səbəbi məlum olub.

Oxu.Az-ın hüquq-mühafizə orqanlarından əldə etdiyi məlumata görə Sumqayıt şəhər sakini Vaqif İsayev polisə ərizə ilə müraciət edərək 2017-ci ilin may ayından bu ilin yanvarın 31-dək olan müddətdə Rusiya vətəndaşı, 42 yaşlı Mamed Nanacanovun onu və ailə üzvlərini öldürəcəyi ilə bağlı hədələyərək, 200 min dollar tələb etməsini bildirib.

M.Nanacanov saxlanılıb.

Onun barəsində Cinayət Məcəlləsinin 182-ci maddəsiylə (hədə-qorxu ilə tələb etmə) cinayət işi başlanılıb.

M.Nanacanov barəsində həbs qəti-imkan tədbiri seçiləcəyi gözlənilir.

10:20
Müğənni Afət Fərmanqızının bir müddət əvvəl ailə qurduğu Mamed Nanacanov adlı şəxs polis tərəfindən saxlanılıb.
Axşam.az xəbər verir ki, ifaçı bu haqda özü məlumat yayıb. O bildirib ki, buna səbəb onun bir şəxsi təhqir etməsi olub:

"Xəzər Rayon Polis İdarəsi səhər saatlarında həyat yoldaşımı saxlayıb. Səbəb kimi göstərilir ki, Vaqif İsayev adlı şəxsi təhqir edib. Bu şəxsin həyat yoldaşıma 200 min dollar borcu var. Binanın sahibidir, 7 ildir ona deyir pulu qaytaracam, amma qaytarmır. Həyat yoldaşım da əsəblərinə hakim olmayıb onu təhqir edib. Əgər təhqirə görə adam həbs olunursa, biz müğənniləri gündə onlarla, yüzlərlə təhqir edən var. Niyə onlar həbs olunmur? Dəfələrlə məni təhqir edəni şikayət etmişəm, tapıb gətirilib, bölmədə başa salınıb, deyilib etika qorunmalıdır, olmaz və sərbəst buraxılıb. Mamacanovla həmin insanların fərqi nədir? İş adamıdır deyə saxlamaq lazımdır? Vaqif İsayevin məndə səsyazısı da var. Deyir ki, canımın qorxusundan mən həbs etdirdim".

Afət əlavə edib ki, həyat yoldaşı Rusiya vətəndaşıdır və orada çalışır.

Telegramda izləyin