Ukraynadakı hadisələrdə ölən və yaralananlar arasında azərbaycanlılar var? - UAR baş katibindən AÇIQLAMA

"Səhər saatlarından etibarən Ukraynada 10-15 şəhər və şəhərətrafı bir sıra strateji obyektlərə raket zərbələri endirilib. Partlayış səsləri qadınların, uşaqların ciddi narahatlığına səbəb olub. Yaralıların olduğu deyilir".

Bu barədə Oxu.Az-a açıqlamasında Ukrayna Azərbaycanlıları Radasının (UAR) baş katibi Ceyhun Məmmədov məlumat verib.

O bildirib ki, səhər saatlarında Kiyevdə də səhər saatlarından əhali arasında təlaş var:

"Əhali arasında çaşqınlıq var. İnsanlar Kiyevdən qərbə tərəf getməyə çalışır. Bu da avtomobil yollarında güclü tıxacların yaranmasına səbəb olub. Hazırda strateji obyektlərdən başqa heç bir yer işləmir. Ölkə ərazisində internetlə bağlı hələ ki bir maneə yoxdur. Düşünürəm ki, hazırda məqsəd camaatı qorxutmaqdır".

O bildirib ki, Ukrayna mətbuatının yaydığı məlumata görə, Ukrayna Rusiyaya məxsus beş təyyarəni vurub:

"Bəzi hərbi ekspertlər düşünür ki, hücumun ilk günü genişmiqyaslı əməliyyatlara başlanmalı və uğur əldə edilməlidir. Bu saata qədər Rusiya ordusu tərəfindən açıq görünən işğal faktı yoxdur. Ukrayna Hərbi Hava Qüvvələri Ukrayna səmasına tam nəzarət edir. Kiyevin yaxınlığında yerləşən kiçik hava limanına raket düşüb. Xarkov, Dnepr Hava Limanlarını isə Ukrayna tərəfi özü bağlayıb ki, uçuşlar olmasın, Rusiya Hava Qüvvələri həmin hava limanlarına enə bilməsinlər".

"Hazırda yayılan bir çox informasiyalar həqiqəti əks etdirmir. Azərbaycanlılar arasında tələfat yoxdur. Biz Xarkovda, Odessa, Hersonda yaşayan soydaşlarımızla danışırıq.

Hazırda məqsəd raket atışları ilə Ukrayna əhalisi arasında xaos yaratmaq və Ukraynanın hava hücumundan müdafiə qurğularını sıradan çıxartmaqdır. Amma buna da hələ nail olunmayıb. Feyk məlumatlar yayılır", - deyə C.Məmmədov qeyd edib.

Telegramda izləyin