Rusiyadan gedən brendlər alıcıların milyardlarını "oğurladılar"

Ukrayna müharibəsi fonunda Rusiyadan gedən xarici brendlər alıcıların hədiyyə kartlarını bloklayıblar.

Sonxeber.az kp.ru-ya istinadən xəbər verir ki, kütləvi şəkildə şikayətlənən ruslar ümumilikdə milyardlarla rubl dəyərində olan pullarını hədiyyə kartlarından çıxara bilmirlər.

Məsələn, qəfil bağlanan "Mango" butikindən şikayətlərin cavabında bildirilib ki, alıcılar hədiyyə kartlarındakı puldan yalnız mağazalar yenidən açıldıqda istifadə edə biləcəklər. Lakin bunun nə zaman olacağı açıqlanmır.

"Opora Rossii" İctimai Birliyinin Birinci vitse-prezidenti Pavel Sigal qeyd edib ki, 2021-ci ilin nəticələrinə əsasən, Rusiyada hədiyyə kartlarının ümumi dəyəri təxminən 6 milyard dollar (cari kursla 850 milyard rubl) təşkil edib:

"Məsələ 2-3 aya həllini tapacaq. Vəsait qaytarılmadan kartların sıfırlanma ehtimalı da var, lakin bu, istənilən brendin nüfuzuna ciddi xələl gətirər".

Rusiyalı alıcılar üçün satışın dayandırılması ilə bağlı elan edən şirkətlər sırasında "Net-a-Porter", "Mr Porter", "Yoox" və "The Outnet" satış platformalarının, eləcə də "Hermes", "Louis Vuitton", "Mango", "ASOS", "Nike", "Adidas", "Puma" və digər iri şirkətlərin adı var.

Natəvan Baxşiyeva

Telegramda izləyin