"Hər iki qardaş ölkə beynəlxalq münasibətlər sistemində analoqu olmayan əməkdaşlığa nail olub"

"Azərbaycanla Türkiyə arasındakı münasibətlər ən yüksək səviyyədə inkişaf edib".

Bunu Sonxeber.az-a danışan deputat Nəsib Məhəməliyev deyib.

Deputat qeyd edib ki, Ulu Öndər Heydər Əliyevin dediyi sözlərlə ifadə etsək, bu münasibətlər "Bir millət, iki dövlət" prinsipini özündə ehtiva edir:

"Ali dövlət orqanları ilə yanaşı, cəmiyyətin bütün strukturlarının sıx əməkdaşlığı mövcuddur. Ancaq, etiraf etmək lazımdır ki, ayrı-ayrı siyasi partiyalar arasında münasibətlər kifayət qədər formalaşmayıb. Bu baxımdan Türkiyənin Ədalət və İnkişaf Partiyası ilə Yeni Azərbaycan Partiyası arasında imzalanmış Əməkdaşlıq protokolu münasibətlərə yeni bir impuls verəcək. Hər iki partiya uzun müddətdir ki, iqtidardadır və ölkələrimizin inkişafında, beynəlxalq nüfuzunun artmasında əhəmiyyətli rol oynayıb. Partiya sədrləri, Prezidentlər İlham Əliyevlə Rəcəb Tayyib Ərdoğan arasında formalaşmış səmimi dostluq, qardaşlıq münasibətləri son dərəcə qarşılıqlı etimada söykənir. Məhz bu etibarın, qardaşlığın, gərgin əməyin nəticəsidir ki, hər iki qardaş ölkə beynəlxalq münasibətlər sistemində analoqu olmayan əməkdaşlığa nail olub. Mürəkkəb geosiyasi şəraitdə işğal olunmuş torpaqlarımız azad olundu. Elə bir sahə yoxdur ki, ölkələrimiz vahid mövqedən çıxış etməsin, aramızda fikir ayrılığı olsun.

Niyyət Protokolu YAP və AKP arasında əməkdaşılığın müxtəlif sahələrini nəzərdə tutur: partiya kadrlarının hazırlanması, təhsil, səhiyyə, gənclər, qadınlar siyasəti, beynəlxalq təşkilatlarda vahid mövqedən çıxış etmə, müxtəlif sahələr üzrə təcrübə mübadiləsi və s. Hər iki Partiya dərin dövlətçilik təcrübəsinə malikdir. Hesab edirəm ki, partiyalar arası münasibətlər xalqlarımız mənafeyinə xidmət edəcək və bütövlükdə Türk dünyasına inteqrasiya proseslərini sürətləndirəcək".

Aysel Yusifqızı

Telegramda izləyin