Rusiyaya qarşı tətbiq olunan sanksiyalar Azərbaycan iqtisadiyytına necə təsir edəcək?

Rusiya-Ukrayna münaqişəsinin Azərbaycan bazarında qiymətlərin bahalaşmasına səbəb olacağı ilə bağlı fikirlər səsləndirilir. Əsasən də bu iki ölkədən gətirilən məhsulların qiymətində kəskin artımın olacağı söylənilir.

Bununla bağlı Sonxeber.az-a danışan deputat İqbal Məmmədov bildirib ki, cənab Prezidentin yürütdüyü daxili və xarici siyasət sayəsində Azərbaycan beynəlxalq aləmdə öz sözünü deyə bilən güclü dövlətdir:

"Hər bir sahədə aparılan islahatlar və gələcəyə hesablanmış addımlar sayəsində biz bütün dünyanı bürüyən koronavirus pandemiyasından az zərərlə çıxmağı bacardıq. Cənab Prezident İlham Əliyevin müdrik iqtisadi siyasəti sayəsində Azərbaycan 2020-ci ildə üzləşdiyi ağır pandemiyanın mənfi təsirlərini artıq arxada qoymaqdadır. Bilirsiniz ki, bütün dünya tək pandemiya ilə mübarizə apardığı dövrdə biz həm də torpaqlarımızı işğaldan azad edərək ərazi bütövlüyümüzü bərpa etdik. Biz 44 gün davam edən Vətən müharibəsində Ali Baş Komandanın necə uzaqgörən siyasətçi olduğunu bir daha gördük. Belə ki, cənab Prezident İlham Əliyevin ölkə başçısı seçildiyi ilk gündən ordu quruculuğu sahəsində atdığı addımlar, verdiyi qərarlar 44 günlük Vətən müharibəsində əldə etdiyimiz qələbənin təminatı idi. Vətən müharibəsində əldə etdiyimiz qələbə Azərbaycan diplomatiyasının geosiyasi meydanda böyük uğurudur. Artıq Vətən müharibəsində qazanılmış parlaq zəfərdən sonra yaranmış yeni reallıqlara və iqtisadi çağırışlara uyğun olaraq, ölkəmizdə bütün sahələrdə uğurlu addımlar nəzərə çarpmaqdadır.

Xüsusilə də ölkəmizin dayanıqlı maliyyə-iqtisadi gücü siyasi, iqtisadi, sosial sabitliyin möhkəmlənməsini təmin etməklə bərabər, yeni inkişaf drayverlərini hərəkətə gətirməkdədir. Məhz buna görə də düşünürəm ki, qonşu dövlətlərdə gedən proseslərin ölkəmizə təsiri olmayacaq.

Təbii ki, müharibə tək iki ölkəyə deyil, bütün regiona mənfi təsir göstərir. Ona görə ümid edirik ki, Rusiya-Ukrayna münaqişəsi tezliklə bitəcək. Rusiya-Ukrayna münaqişəsinin Azərbaycan bazarına təsiri məsələsinə gəldikdə, təbii ki, burada ən ağır yük səlahiyyətli qurumların üzərinə düşür. Bazarlar vaxtaşırı monitorinqlər aparılıb, vəziyyətdən sui-istifadə edib məhsulların qiymətini suni şəkildə bahalaşdıranlara qarşı qanun çərçivəsində tədbirlər görməlidirlər".

Deputat vurğulayıb ki, bu gün Rusiya Azərbaycanın əsas iqtisadi tərəfdaşlarından biridir:

"Bu gün Azərbaycan dünya iqtisadiyyatına inteqrasiya edib. Məhz buna görə Azərbaycanın, Rusiya ilə yanaşı, digər ölkələrlə də getdikcə genişlənən çox böyük iqtisadi əlaqələri var. O ki qaldı tətbiq olunan sanksiyalara, əlbəttə, bu, Rusiya iqtisadiyyatına ciddi təsir edir və etməkdə də təsir edəcək. Təbii ki, müharibənin region ölkələrinə bu və ya digər formada təsirsiz ötüşməyəcəyi sirr deyil. Azərbaycan hər zaman xarici təsirlərə qarşı vaxtında tədbirlər görüb. Bundan sonra da bu cür qabaqlayıcı addımlar atılmağa davam edəcək.

Biz bunu pandemiyada və ondan əvvəlki proseslərdə də gördük. Belə ki, Azərbaycan dövləti iqtisadiyyata kənar təsirlərin qarşısını almaq üçün adekvat tədbirlər həyata keçirir və dövlət proqramları tərtib edir. Ona görə də, hesab edirəm ki, Rusiyaya qarşı tətbiq olunan bu sanksiyalar Azərbaycan iqtisadiyytına öz ciddi təsirini göstərməyəcək".

Aysel Yusifqızı

Telegramda izləyin