"Divarlar hündür, qapılar bağlıdır" - Deputatlar Novruz adətləri haqqında

Azərbaycanda ilin başlanmasının, yazın gəlməsinin bayram kimi qeyd edilməsi qədim bir tarixə malikdir. Novruz bayramı Azərbaycana yazın gəlişini simvolizə edən, keçmiş zamanlardan xalq arasında bir ənənəyə çevrilən qədim xalq bayramıdır. Novruz adətlərində ulu babalarımızın ən müdrik dünyagörüşü, humanist baxışları, həlim, qayğıkeş təbiəti özünü göstərir.

Deputatlarımız arasında Novruz adət-ənənələrini qeyd edən, küsülü olub barışan, papaq atma kimi adətləri hələ də edən varmı?

Sualla bağlı Sonxeber.az millət vəkilləri arsında sorğu keçirib:

Arzu Nağıyev:

"Mənim təmsil etdiyim Tovuz-Gədəbəydə Novruz adət-ənənələri həmişə ən yüksək səviyyədə keçirilir. Uşaqlıqdan görmüşəm ki, qapı-qapı getmək, tonqal qalamaq, yaylıq atmaq, yumurta boyamaq, şəkərbura-paxlava bişirmək kimi adətlər var. Bizdə papaq atmaq olmasa da, torba atmaq olub. Uşaqlıqdan şahidim olduğum adətlər hələ də var".

Fazil Mustafa:

"Uşaq vaxtı Novruz bayramını qeyd etmişik. Sonrakı dövrlərdə isə bu əyləncələrə qatılmamışıq. Təbii ki, bizə qonşudan papaq atılır, onun da içinə ya pul, ya alma, ya konfet qoyuruq. Bu adətlər insanların bir-birinə isinməsi baxımından vacibdir.

Küsülülərin barışması məsələsində, əlbəttə, əlçatan insanlarla hər hansı bir şəkildə küsülülüyü atırsan. Amma elə insanlar var ki, onlarla elə küsülü qalmaq yaxşıdır, çünki hamı ilə barışmaq insan həyatında elə də xoş aura yaratmır. Çalışırq ki, ən azından yaxın çevrədə olan insanlarla münasibətləri normal saxlayaq, əgər bir inciklik varsa, onu aradan qaldıraq.

Ümumilikdə, Novruz çox gözəl bayramdır və insanların onu qeyd etməsi çox yaxşı haldır.

Adətlərin qorunub-saxlanılması yaradıcı xarakter daşıyır. Əsrlər keçdikcə əvvəlkilərdən fərqli qeyd olunan müəyyən məsələlər olur. Hesab edirəm ki, tonqal yandırıb onun üstündən tullanmaq, onun üzərində müəyyən arzuları dindirmək yaxşı bir haldır.

İndi əvvəlki kimi deyil. Divarlar hündür, qapılar bağlıdır. Kiminsə gəlib başqasının həyətində nəyəsə qulaq asması, bir söz eşitməsi, onu yozması indi, bəlkə, bir az primitiv görsənir.

Amma hər halda, bütün adətlərimiz gözəldir və insanlar hansını istəyirsə, yaşada bilərlər".

Müşviq Məmmədli:

"Qohum-əqrəbanı, yaxınları, yaşca böyük olanları ziyarət etmək kimi adətləri bu gün də yerinə yetiririk. İndi özüm papaq atmasam da, övladlarımız bu və digər adətləri yaşadırlar.

Bəzi adətlər var ki, onlar qeyd olunsa da, bir az zəifləyib. Həm digər regionlarda olan qohumların bayram günü ziyarət olunması, həm yaşadığımız məkanın təmizlənməsi kimi ənənələr onların sırasına daxildir.

Sonxeber.az kollektivini qarşıdan gələn bayram münasibətilə təbrik edirəm. Xalqımıza həmişə əmin-amanlıq və hər birimizə sağlamlıq, möhkəm bünövrəsi olan Azərbaycan dövlətinin daha da güclənməsini arzu edirəm!"

Aygün Osmanlı

Telegramda izləyin