Nərmin Quliyeva cinayətinin şahidi: "İlkinin əleyhinə danışmadım deyə məni işdən çıxardılar" - YENİLƏNİB

Gəncə Ağır Cinayətlər Məhkəməsində Tovuz rayonunun Dondar Quşçu kəndində azyaşlı Nərmin Quliyevanı qətlə yetirməkdə təqsirləndirilən İlkin Süleymanovun cinayət işi üzrə məhkəmə prosesi davam etdirilib.

Trend-in məlumatına görə, hakim Dadaş İmanovun sədrliyi ilə keçirilən prosesdə ifadə verən, təqsirləndirilən şəxs İlkin Süleymanovun qonşusu Nazim Vəliyev bildirib ki, meyit onun hasarına bitişik hissədə yandırılıb.

"Mən həmin vaxt evdə idim. İlkin Süleymanov bizim qapını döydü və dedi ki, orada cəsəd yanır. Dərhal İlkinlə birlikdə meyit yanan yerə getdik. İlkin polisdə işləyən əmisi oğlunu zəng vurub çağırdı ki, bu barədə polisə məlumat versin. O, polisə məlumat verdi. Biz İlkinlə qərara gəldik ki, hadisə anını telefona çəkək, gələcəkdə istintaqa lazım ola bilər. Telefonla çəkdik və mən evdən bel gətirdim, İlkin və əmisi oğlu isə su gətirdilər. Mən evdən bel gətirənə qədər İlkinlə əmisi oğlu meyitin qarın hissəsinə qədər olan yerini söndürmüşdü", - deyə şahid bildirib.

Prosesdə ifadə verən digər şahid, İlkin Süleymanovun qonşusu Mahir Orucov isə bildirib ki, o, həmin gün evdə olub:

"Yoldaşım həyətdən gəldi dedi ki, küçəyə polislər gəlib. Küçəyə çıxanda bildim ki, bizim küçədə meyit yandırıblar. Polislər meyitə 15 metr qalmış lentdən sipər çəkmişdilər. Yaxına heç kimi buraxmırdılar. Mən küçəyə çıxanda Nərminin atası hələ gəlməmişdi. 2 saata yaxın orada oldum, hələ də Nərminin atası orada yox idi. İlkin uşaqlıqdan mənim gözümün önündə böyüyüb. Həmişə onu tərbiyəli adam kimi tanımışam. Mən həmin vaxta qədər Dəmir yolunda fəhlə işləyirdim. İlkinin əleyhinə ifadə vermədiyim üçün məni işdən çıxarıblar".

Xatırladaq ki, 2019-cu ilin noyabrın 19-dan itkin düşən Tovuz rayonunun Dondar Quşçu kənd sakini, 10 yaşlı Nərmin Quliyevanın qətlə yetirilərək yandırılan meyiti 2020-ci il yanvarın 6-da kənd ərazisində aşkar edilib.

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində bu ağır cinayəti törətməkdə şübhəli bilinən Dondar Quşçu kənd sakini, 1973-cü il təvəllüdlü Süleymanov İlkin İbrahim oğlu tutularaq istintaqa cəlb edilib.

İ. Süleymanova Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələr ilə təqsirli bilinərək barəsində cinayət işi açılıb.
İstintaq orqanı tərəfindən İlkin Süleymanovun barəsində Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) və 145.3-cü (qanunsuz azadlıqdan məhrum etmə, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə ittiham elan edilib.

19:19

Bu gün Gəncə Ağır Cinayətlər Məhkəməsində Tovuz rayonunda 10 yaşlı Nərmin Quliyevanı qətlə yetirməkdə təqsirləndirilən İlkin Süleymanovun cinayət işi üzrə növbəti məhkəmə prosesi keçirilib.

"Report"un Qərb bürosunun məlumatına görə, hakim Dadaş İmanovun sədrliyi ilə bu gün İlkin Süleymanovun növbəti məhkəmə prosesində Nazim Vəliyev və Mahir Orucov ifadə verib.

Onlar kənd sakinləridir və Nərmin Quliyevanın meyti tapılan zaman görənlərdir.

Onlar həmin anlarla bağlı təqsirləndirilən İlkin Süleymanovun vəkillərinin suallarını cavablandırıblar.

Hakimin qərarı ilə növbəti məhkəmə martın 30-na təyin olunub.

Xatırladaq ki, Tovuz rayonunun Dondar Quşçu kənd sakini N.Quliyeva 2019-cu il noyabrın 21-də itkin düşüb, onun meyiti 2020-ci il yanvarın 6-da yandırılmış halda tapılıb. 2020-ci il yanvarın 10-da isə hadisəni törətməkdə şübhəli bilinən Dondar Quşçu kənd sakini, 1973-cü il təvəllüdlü İ.Süleymanov saxlanılaraq istintaqa cəlb edilib. Ona Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələrində nəzərdə tutulan ittiham elan olunub.

Telegramda izləyin