Milli Qəhrəmanın ailəsi Xarkovdan Bakıya təxliyə edilir

Ukraynada davam edən müharibə ilə əlaqədar Azərbaycanın Milli Qəhrəmanı Viktor Vasilyeviç Seryoginin ailəsinin təxliyəsi istiqamətində təxirəsalınmaz işlər aparılır. Seryoginin ailəsinin Xarkov şəhərində yerləşən binaya mərmi düşməsi nəticəsində onların mənzili tamamilə dağıdılıb. Milli Qəhrəmanın ailə üzvlərinin tez bir zamanda təxliyə olunması üçün bir neçə qurum fəal işə başlayıb.

Bu barədə Azərbaycan-Ukrayna parlamentlərarası əlaqədər üzrə işçi qrupunun rəhbəri Rüfət Quliyev Pravda.az-a açıqlamasında deyib.

Bildirilib ki, Milli Qəhrəmanının ailəsinin Azərbaycana təxliyəsi üçün Milli Məclisin deputatı Rüfət Quliyev, Azərbaycan Qadın Sahibkarlığının İnkişafı Assosasiyasının həmtəssisçisi Cəmilə Abdullayeva, "Kiyev Azərbaycanlıları Konqresi" İctimai Təşkilatının sədri Oleq Krapivin lazımi tədbirləri həyata keçirirlər. Seryoginin ailəsini Azərbaycanın Moldova Respublikasındakı fövqəladə və səlahiyyətli səfiri Qüdsi Osmanov qarşılayacaq və ailənin tam təhlükəsiz olaraq Bakıya uçuşunu təşkil edəcək.

Azərbaycanın Milli Qəhrəmanı Viktor Vasilyevic Seryoginin ailəsinin təhlükəsiz şəkildə Bakıya qayıtması və dövlət tərəfindən şəhid ailələri üçün təsis olunan bütün imtiyazlardan istifadə etməsi, xüsusilə bu ailələrə verilən mənzillə təmin olunması üçün bütün mümkün əlaqələrdən istifadə edilir.

Bu haqda əlaqədar şəxs deputat Rüfət Quliyev tərəfindən qurumlara rəsmi müraciətlər olunub.

Telegramda izləyin