Mikroavtobusla yük maşını toqquşub: Ölənlərin sayı artdı - YENİLƏNİB + FOTO

Bakı-Qazax magistralında baş verən yol-nəqliyyat hadisəsi zamanı yaralanan üç nəfərin kimliyi məlum olub.

Oxu.Az-ın əldə etdiyi məlumata görə, qəza zamanı 2003-cü il təvəllüdlü N.Qasımov, 1951-ci il təvəllüdlü Ə.Əmiraslanov və 1971-ci il təvəllüdlü M.Əliyeva müxtəlif dərəcəli bədən xəsarətləri ilə Ağstafa Rayon Mərkəzi Xəstəxanasına yerləşdiriliblər.

Ağstafa Rayon Mərkəzi Xəstəxanasından verilən məlumata görə, yaralıların vəziyyəti qənaətbəxşdir:

"M.Əliyeva çənə nahiyəsindən xəsarətlər alıb. Yaralı Qazax Rayon Mərkəzi Xəstəxanasına göndərilib. Həkim müayinəsi zamanı digər yaralı N.Qasımovun baş beyin zədələnməsi, Ə.Əmiraslanova sağ ayağın sınığı, baş beyin zədələnməsi diaqnozu qoyulub. Onlar isə hazırda Ağstafada Rayon Mərkəzi Xəstəxanasında müalicələrini davam etdirirlər".

15:01
Bakı-Qazax magistralında baş verən yol-nəqliyyat hadisəsi zamanı ölənlərin sayı üçə çatıb.

Oxu.Az-ın məlumatına görə, qəzada xəsarət alan Mirvari Vəliyeva xəstəxanada dünyasını dəyişib.

Tibbi Ərazi Bölmələrini İdarəetmə Birliyindən saytımıza bildirilib ki, yaralıların vəziyyəti qənaətbəxşdir.

Qeyd edək ki, qəza zamanı 1961-ci il təvəllüdlü Familə Fərman qızı Məmmədova və 1962-ci il təvəllüdlü Mayıl Nağıyev hadisə yerində həlak olublar.

13:18

Bakı-Qazax avtomobil yolunda ölümlə nəticələnən yol-nəqliyyat hadisəsi olub.

Oxu.Az-ın məlumatına görə, "Mersedes Sprinter" markalı mikroavtobus yük maşını ilə toqquşub.

Baş verən qəza nəticəsində iki nəfər həlak olub, bir neçə nəfər yaralanıb.

Qeyd edək ki, qəzaya uğrayan mikroavtobus Gəncə-Qazax xətti üzrə işləyirmiş.

Faktla bağlı araşdırmalara başlanılıb.

Telegramda izləyin