Nazirlikdən küçədə gecələyən Vətən müharibəsi qazisi ilə bağlı AÇIQLAMA

Əmək və Əhalinin Sosial Müdafiəsi Nazirliyi Vətən müharibəsi qazisinin küçədə gecələməsi ilə bağlı yayılan xəbərə münasibət bildirib.

Qurumdan Oxu.Az-ın sorğusuna cavab olaraq bildirilib ki, Vətən müharibəsinin iştirakçısı Cəfərov Sədi Sahib oğlunun videomüraciətilə bağlı onunla telefon əlaqəsi yaradılıb və müraciəti araşdırılıb:

"Vətəndaş bildirib ki, ailə 12 nəfərdən (atası, anası, qardaşı və onun ailəsi, özü, həyat yoldaşı və bir azyaşlı övladı) ibarətdir, Ağcabədi rayonu, Təzəkənd kəndində yaşayır. Ailənin əməkqabiliyyətli üzvləri işsizdirlər. Lakin mülkiyyətlərində pay torpağı var.

Sədinin həyat yoldaşı Cəfərova Elnarə Vaqif qızı ünvanlı sosial yardımla bağlı 21.01.2021-ci il tarixdə müraciət edib. Lakin onun bu müraciətinə elektron sistem tərəfindən imtina verilib. Səbəb isə elektron ərizədə məşğulluq və digər məlumatları düzgün qeyd etməməsi olub.

Vətəndaşa sosial yardımla bağlı elektron qaydada müraciət edərkən ərizədə bu məlumatların, o cümlədən ailənin mülkiyyətində olan kənd təsərrüfatına yararlı torpağa aid məlumatların düzgün qeyd edilməsinin vacib olduğu deyilib. Yeni müraciətdə məlumatların doğru olması ailənin sosial yardımla təmin edilməsi üçün əsas ola bilər".

S.Cəfərov həmçinin 29.06.2021-ci il tarixdə iribuynuzlu heyvandarlıq zərfi üzrə özünüməşğulluq proqramına cəlb olunub:

"Yaxın müddətdə ona kiçik təsərrüfat yaradılacaq. Sədinin əlilliyinin qiymətləndirilməsinə gəldikdə, 06.08.2021-ci il tarixində o, əyani müayinə edilib, hazırkı vəziyyətinin əlillik təyinatına əsas vermədiyi müəyyən edilib. Əlavə olaraq, Sədinin ailəsinə sığorta ödənişi (550 manat) və "YAŞAT" Fondu tərəfindən maddi-məişət şəraitinin yaxşılaşdırılmasına dəstək olaraq maddi yardım (2500 manat) edilib".

Qeyd edək ki, ötən gün qazi S.Cəfərovun kirayə haqqını ödəyə bilməməsi səbəbindən küçədə gecələməsi barədə görüntülər yayılıb.

Telegramda izləyin