Siqnal verənlər cərimələnəcək? - AÇIQLAMA

Bir çoxları avtomobil sürücülərinin yersiz siqnallarından narahat olduqlarını bildirirlər. Belə şəxslərə qarşı hər hansı bir cəza tədbirləri görülə bilərmi? Bunun cəriməsi nə qədər ola bilər?

Məsələ ilə bağlı Sonxeber.az Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədovun fikrini öyrənib.

O bildirib ki, səs siqnallarının verilməsi Azərbaycan Respublikasının "Yol hərəkəti haqqında" Qanununa uyğun olmalıdır.

"Əslində bu gün hər kəsi düşündürən və təbliğatı vacib olan bir mövzuya toxunmusunuz.

"Yol hərəkəti haqqında" Qanunun tələbinə əsasən, səs siqnalı ölkə ərazisində istismar edilən nəqliyyat vasitəsi tərəfindən yalnız 2 halda istifadə oluna bilər:

1. yol nəqliyyat hadisəsinin qarşısının alınması məqsədi ilə,
2. yaşayış məntəqələrindən kənarda, qarşıda hərəkət etməkdə olan nəqliyyat vasitəsini ötmək istəyərkən xəbərdarlıq niyyəti ilə.

Amma təəssüflər olsun ki, siz dediyiniz kimi, bu gün Bakı şəhərində, hətta insanların çox yaşadığı ərazilərdə də bu səs siqnallarından istifadə olunur.

Əslində səs siqnallarında lüzumsuz istifadəyə görə inzibati tənbeh tədbirləri görülür. 2021-ci il ərzində çoxavazlı, yüksək tonlu, səsi artırıb-azaldan, sirena, musiqi tipli səs siqnallarının nəqliyyat vasitəsinə quraşdırılması və istismarına görə 400-dən çox sürücü hakim qarşısında cavab verib.

Ümumiyyətlə, bu tip siqnalların istifadə edilməsinə görə səs siqnalının müsadirəsi və 500 AZN məbləğində cərimə edilməsi nəzərdə tutulub.
Ayrıca bilirsiniz ki, şəhər daxilində, yaşayış məntqələrində, tədris ocaqları ətrafında, xüsusilə Bakı şəhəri mərkəzində səs siqnalının verilməsi qadağandır. Bunun üçün yol nişanları da qoyulub. Yol polisi də belə hallarla qarşılaşdığı zaman inzibati tənbeh tədbirləri görüb, görür və sözsüz ki, təhlükəsizliyin təmin edilməsi məqsədi ilə də görəcək.

Lakin görünür, burada daha da geniş şəkildə təbliğatın, profilaktik söhbətlərin aparılmasına zərurət var.

Qadağalara, cərimələrə baxmayaraq, yenə də siqnaldan istifadə edilir. Hesab edirəm ki, burada sanki bizim mental xüsusiyyətlərimizlə bağlı təhlükəli bir vərdişimiz var ki, bu vərdişdən azad ola bilmirik.

Bu nədir?! Sevinəndə, biri-birimizi çağıranda, xüdahafizləşəndə, yol istəyəndə, önə keçmək istəyəndə və hətta ailə quranda səs siqnallarından istifadə edirik.

Dünyanın ən gözəl milləti, xalqı bizik. Ən gözəl adət-ənənələr də bizdədir. Lakin təəssüflər olsun ki, mentalitetimizlə bağlı olan təhlükəli vərdişlərimiz də var. Biz bu vərdişlərdən inzibati tənbeh tədbirlərinin həyata keçirilməsi ilə deyil, eyni zamanda bu sahədə çalışan jurnalist dostlarımızın köməyi ilə qurtulmalıyıq. Dəfələrlə bu barədə mətbuatda bildirilməlidir, insanlara izah olunmalıdır ki, səs siqnallarından istifadə etmədən də sərbəst hərəkət etmək mümkündür.

Bəzən sürücülər yolların hərəkət hissəsində, yol zolaqları üzrə nəqliyyat vasitələri sıx cərgələndikdə və ya işıqforla tənzimlənən ərazidə siqnalı verməklə hərəkət etməyə çalışırlar.

Əgər səs siqnalının verilməsi ilə hərəkət tənzimlənsə idi, elə yol polisi olaraq, biz özümüz bu səs siqnallarından istifadə edərdik.

Ən azından, arxada olan sürücü bilməlidir ki, özündən qarşıda hərəkət edən sürücü dayanıbsa, deməli ya işıqforu gözləyir, ya sıxlıq var, ya piyada keçir, ya da digər səbəblər var. Səs siqnalı verməklə qarşıdakınını hərəkətə məcbur etmək yaxşı əlamət deyil. Sükan arxasında olan sürücü təmkinli olmalı, səs siqnalından istifadə etməzdən əvvəl düşünməlidir.

Fürsətdən istifadə edib, bir daha sürücüləri, avtomobil sahiblərini lüzumsuz olaraq səs siqnallarından istifadə etməməyə çağırıram. Bu səs siqnallarından istifadə etməklə biri-birimizi xəbərdar etmək lüzumsuz bir hərəkətdir".

ZAİRA AKİFQIZI

Telegramda izləyin