"Bu sənəddə əsas məqam Azərbaycanın ərazi bütövlüyüdür" - Sona Əliyeva

"Aprelin 6-da 4 saat yarımdan artıq davam edən görüşün nəticəsi olaraq, Ermənistanla Azərbaycan arasında sülh müqaviləsi üzrə danışıqların başlanması və bununla bağlı işçi qrupun yaradılması qərara alındı, Azərbaycan və Ermənistan XİN-lərinə müvafiq təlimatlar verildi".

Bunu Sonxeber.az-a danışan politoloq Sona Əliyeva bildirib.

O, qeyd edib ki, Avropa İttifaqı Şurasının prezidenti Şarl Mişelin vasitəçiliyi ilə aprelin 6-da Brüsseldə Azərbaycan Prezidenti İlham Əliyev və Ermənistanın Baş naziri Nikol Paşinyan arasında sayca ikinci üçtərəfli görüş növbəti dəfə Azərbaycanın diplomatik qələbəsi ilə yekunlaşdı:

"Liderlərin ortaq bəyanatından çıxış edərək, görüşdə bir neçə nəticənin əldə edildiyini söyləmək mümkündür.

Birincisi, tərəflər həll edilməmiş humanitar məsələlərin aradan qaldırılmasının zəruriliyini vurğulayıblar. Bu sıraya Avropa İttifaqının minatəmizləmə, münaqişədə zərər çəkmiş əhaliyə yardım, reabilitasiya və yenidənqurma işlərinə ekspert və maliyyə dəstəyi aiddir. Ermənistan rəsmiləri hər yerdə Azərbaycan əleyhinə "erməni əsirlərin qaytarılması" mövzusunu qaldırırlar. Bunun qarşılığında Azərbaycan rəsmiləri Birinci Qarabağ savaşında minlərlə azərbaycanlı əsirin taleyi mövzusunu gündəmə gətirirlər. Ermənistan bu mövzunun üstündən sükutla keçməyə çalışır.

İkincisi, Azərbaycanla Ermənistan arasında sərhədin delimitasiyası məqsədilə aprelin sonuna qədər birgə komissiyanın yaradılması və iclasının keçirilməsi nəzərdə tutulub. Birgə sərhəd komissiyasının mandatı Ermənistanla Azərbaycan arasında ikitərəfli sərhədin delimitasiyası, sərhəd xətti boyunca və onun yaxınlığında sabit təhlükəsizlik vəziyyətini təmin etməkdən ibarət olacaq.

Üçüncüsü, bəyanata əsasən, xarici işlər nazirlərinə bütün zəruri məsələlərin həll olunacağı gələcək sülh müqaviləsini işləyib hazırlamağın tapşırılması qərara alınıb.

Dördüncüsü, liderlər Ermənistanla Azərbaycan arasında, xüsusən də Cənubi Qafqazda kommunikasiya infrastrukturunun bərpasını müzakirə ediblər".

Sona Əliyeva vurğulayıb ki, sülh razılaşmasının əsas komponenti Azərbaycanın irəli sürdüyü 5 maddədən ibarət təklif və bunun əsasında predmetli danışıqların aparılmasıdır:

"Bu sənəddə əsas məqam Azərbaycanın ərazi bütövlüyüdür. Müharibədə məğlubiyyətə uğrayan Ermənistan sülh müqaviləsinin imzalanmalı olduğunu çox gözəl başa düşür. Ancaq çalışır ki, bu məsələləri ləngidərək vaxt qazansın. Ermənilər bununla hər hansısa bir vəziyyətdən özlərinə pay çıxarmaq niyyətindədirlər, lakin bunun olma ehtimalı sıfıra bərabərdir. Rusiyanın da bu məsələyə müsbət yanaşdığının şahidi olduq. 10 noyabr və 11 yanvar bəyanatlarında da sülhə doğru addımlamaq lazım olduğu vurğulanıb. Ermənistan hakimiyyətinin əsas problemlərindən biri odur ki, onlar müstəqil siyasət həyata keçirə bilmirlər. Adıçəkilən ölkənin daxilində çox ciddi etirazlar var və bunları edənlər radikal qruplardır. Həmin şəxslər istənilən şəraitdə Paşinyan və onun ətrafına maneə törədirlər ki, bu proseslərdə irəliləyiş olmasın. Ancaq onlar nə qədər problem yaratmağa çalışsalar da, biz istəklərimizə nail olduq. Tezliklə sərhədlərin demarkasiyası və delimitasiyası aparılacaq, böyük sülh sazişi də imzalanacaq. Çünki Ermənistanın buna alternativ çıxış yolları artıq dalana dirənib".

Aysel Yusifqızı

Telegramda izləyin