Ramazan ayında toy etmək olar? - AÇIQLAMA

Bu gün Ramazan ayının artıq yeddinci günüdür. Bir çox gənclərimiz bu ayda da toy edib, ailə qururlar. Bəzi insanlar isə dini baxımdan Ramazan ayında toy etməyin doğru olmadığını bildirirlər. Bəs görəsən, Ramazan ayında toy etmək olarmı?

Məsələ ilə bağlı Sonxeber.az-a ilahiyyatçı, Elm və təhsil komitəsinin üzvü, deputat Ceyhun Məmmədov açıqlama verib.

O bildirib ki, dində bununla bağlı heç bir məhdudiyyət yoxdur:

"Bəzən cəmiyyətdə bununla bağlı yanlış fikirlər yaratmağa çalışırlar. Amma belə iddialar əsassızdır. İmsak və iftarı nəzərə almaqla, Müqəddəs Ramazan ayında toy etməyin heç bir problemi yoxdur.

Dini mətnlərdə bununla bağlı heç bir qadağaya rast gəlinmir. Sadəcə, qeyd etdiyim kimi, burada orucun qaydalarına riayət olunmalıdır.

Məsələn, insanlar oruc tutduqlarına görə toyu gündüz vaxtı etmək düzgün olmaz. Məclis iftar vaxtında keçirilərsə, burada heç bir problem yoxdur.

Bir sözlə, qayda, şərt və prinsipləri gözləmək şərtilə Mübarək Ramazanda toyun keçirilməsi icazəlidir".

ZAİRA AKİFQIZI

Telegramda izləyin