ABŞ-dan Ukraynadakı yeni rus komandirlə bağlı XƏBƏRDARLIQ

ABŞ-ın milli təhlükəsizlik müşaviri Ceyk Sallivan deyib ki, ABŞ Putinin Ukraynaya qarşı müharibəyə atdığı general Aleksandr Dvornikovun mülki şəxslərə qarşı daha qəddar hücumlar edəcəyini gözləyir.
Sonxeber.az "The New York Times"a istinadla xəbər verir ki, Sallivan bu barədə "İttifaqın vəziyyəti" proqramında danışıb.
"Bu xüsusi generalın digər əməliyyatlarda, xüsusən də Suriyada mülki şəxslərə qarşı vəhşiliyini göstərən tərcümeyi-halı var. Biz ondan Ukraynada daha çox şey gözləyirik. Bu general cinayətlərin növbəti icraçısı olacaq və Ukraynada mülki insanlara qarşı qəddarlıq törədəcək", - Sallivan bildirib.
"Defense Express" informasiya və konsaltinq şirkətinin direktoru Sergey Zqurets "Radio NV"nin efirində bu generalın Suriya və Çeçenistanda döyüşdüyünü vurğulayıb. O, hərbi əməliyyatlar zamanı Dvornikovun mülki əhaliyə qarşı xüsusi qəddarlığı ilə fərqləndiyini bildirib.
"Onun 2000-ci ildə Çeçenistanda, Qroznıda vəziyyətin yatırılmasında təcrübəsi var. Sonra Suriyada bir qrup rus qoşununa komandanlıq edib. Onun Kremldə siyasi tərəfdarları var. Bu vəzifəyə təyin olunana qədər bir vaxtlar müdafiə nazirinin müavini vəzifəsinə də baxıb. Əslində müəyyən siyasi ambisiyaları və hərbi təcrübəsi olan şəxsdir", - Zqurets bildirib.
O qeyd edib ki, Çeçenistan və Suriyada Dvornikov eyni tipli təcrübədən istifadə edirdi:
"Əhalinin müqavimət göstərə biləcəyi əraziləri tamamilə məhv etmək üçün artilleriya və aviasiyadan istifadə edirdi, müqavimətin davam etdiyi şəhərlərdə isə kimyəvi silahdan istifadə olunurdu".

Telegramda izləyin