"Bərpa-quruculuq işləri Qarabağa yeni və müasir görkəm verir, erməni vandalizminin izlərini silir"

"Hazırda işğaldan azad olunan rayon və şəhərlərdə bərpa, yenidənqurma işləri uğurla davam etdirilir".

Bunu Sonxeber.az-a danışan deputat Cavanşir Paşazadə deyib.

Deputat vurğulayıb ki, tezliklə Qarabağda bütün infrastruktur bərpa olunacaq:

"44 günlük Vətən müharibəsində düşmən üzərindəki möhtəşəm qələbəmizdən sonra ölkə başçısı Azərbaycanın Birinci vitse-prezidenti Mehriban xanım Əliyeva ilə birlikdə dəfələrlə işğaldan azad olunan ərazilərə səfər edərək, erməni vəhşiliyini dünyaya nümayiş etdirdi. Cənab Prezidentin fərmanları ilə Ağdam rayonunda Ağdam Sənaye Parkı yaradıldı, işğaldan azad edilmiş ərazilərdə Azərbaycan Respublikası Prezidentinin xüsusi nümayəndəlikləri təsis edildi. Hazırda da "ağıllı kənd", "ağıllı şəhər" layihələrinin icrası, yeni hava limanının tikintisi, yol infrastrukturunun yenidən qurulması kimi bir sıra abadlıq işləri aparılmaqdadır.

İşğaldan azad olunan bölgələrdə vətəndaşlarımızın doğma ata-baba yurdlarında daimi məskunlaşması və firəvan yaşaması üçün lazımi tədbirlər həyata keçirilməkdədir. Həmin ərazilərdə bütün infrastruktur təmin olunacaq. Tarixi abidələr bərpa olunur, yeni yol-nəqliyyat infrast­rukturu yaradılır, yüksəkgərginlikli elektrik xətləri çəkilir, yeni yarımstansiyalar inşa olunur. Bu genişmiqyaslı prosesdə xarici ölkələrin şirkətləri də yaxından iştirak edirlər. Təbii ki, Qaraba­ğın bərpası təkcə Azərbaycanın deyil, bütövlükdə regionun iqtisadiyyatının mühüm tikintisi olacaq və regional əməkdaşlığın daha da güclənməsinə təkan verəcək".

Deputat vurğulayıb ki, işğaldan azad olunan ərazilərin bərpası Prezident İlham Əlyevin 2 fevral 2021-ci il tarixli "Azərbaycan 2030: Sosial-iqtisadi inkişafa dair Milli Prioritetlər" barədə imzalanmış Sərəncamda öz əksini tapıb:

"Bu məsələnin növbəti illərdə ölkənin sosial-iqtisadi inkişafına dair beş milli prioritetdən biri olaraq müəyyən edilməsi ölkə rəhbərliyinin məsələyə böyük əhəmiyyət verdiyini təsdiqləyir. Bilirsiniz ki, bərpa-quruculuq işlərinin həyata keçrilməsi üçün 2021-ci ilin dövlət büdcəsindən 2,2 milyard manat vəsait də ayrılıb. Həmçinin, işğaldan azad olunan ərazilərdə bərpa-quruculuq və abadlıq işlərinin aparılması, habelə təhlükəsiz yaşayışın, səmərəli fəaliyyətin və rifahın davamlı artmasının dəstəklənməsi məqsədilə Qarabağ Dirçəliş Fondu da təsis olundu. Bu fondun yaradılmasında məqsəd işğaldan azad olunan ərazilərdə dayanıqlı məskunlaşma üçün müasir və layiqli həyatın təmin edilməsi, bütün sahələrdə bərpa-quruculuq və abadlıq işlərinin aparılması, habelə təhlükəsiz yaşayışın, səmərəli fəaliyyətin və rifahın davamlı artmasının dəstəklənməsidir.

Bilirsiniz ki, 30 il ərzində erməni vandalları həmin ərazilərədə insanlığa sığmayan vəhşiliyə imza ataraq, oradakı bütün infrastrukturu, maddi və mədəni abidələri dağıdıb, yeraltı sərvətlərimizi vəhşicəsinə talan ediblər. Ona görə də, işğaldan azad olunan ərazilərə normal həyatın qaytarılması və iqtisadi inkişafın bərpası kifayət qədər böyük maliyyə vəsaiti tələb edir. Qısa müddət kəsiyində Azərbaycan Prezidentinin təşəbbüsü ilə Füzuli, Cəbrayıl, Xocavənd, Kəlbəcər, Laçın, Zəngilan, Qubadlı rayonlarında və Şuşa şəhərində infrastruktur layihələrinin reallaşmasına start verilib, yol-nəqliyyat infrastrukturu yaradılır, kommunikasiya xətləri çəkilir, təhsil, səhiyyə, turizm və sənaye müəssisələri tikilir, hava limanları inşa edilir, mədəni, tarixi və dini abidələr bərpa olunur.

Həyata keçirilən bərpa-quruculuq işləri Qarabağa yeni və müasir görkəm verir, erməni vandalizminin izlərini silir, işğaldan azad olunan ərazilərə həyatın qayıtdığını göstərir. Şübhəsiz ki, cənab Prezident İlham Əliyevin rəhbərliyi və bilavasitə nəzarəti ilə görülən işlər, bu ərazilərdə onun həyata keçirdiyi regional siyasət Qarabağımızı milli və beynəlxalq mədəniyyət və turizm mərkəzinə, təhlükəsiz yaşayış məkanına, regionun və dünyanın ən gözəl guşələrindən birinə çevirəcək. Ən önəmlisi isə odur ki, Qarabağda aparılan abadlıq və quruculuq işləri, məcburi köçkünlərimizin oraya qayıdışının təminatı, sosial infrastrukturun bərpası, həmçinin orada iqtisadiyyatımızın inkişafına töhfə verən müəssisələrin yaranmasına və əhalinin məşğulluğunun təmin olunmasına da öz müsbət təsirini göstərəcək".

Aysel Yusifqızı

Telegramda izləyin