Qədr gecələri ilə bağlı AÇIQLAMA

Artıq mübarək Ramazan ayının yarısından çoxu keçib. Qarşıdan Qədr gecələri gəlir. Bu gecələrin fəziləti, əməlləri nədən ibarətdir?

Sonxeber.az bu mövzuda suallarını Qafqaz Müsəlmanları İdarəsinin sədr müavini Fuad Nurullayevə ünvanlayıb.

O bildirib ki, Peyğəmbərimizdən bizə çatan hədisə əsasən, Qədr gecələri Ramazan ayının sonuncu 10 günündən birinə təsadüf edir:

"Hətta hədislərdə hər gecəni Qədr gecəsi bilməyimiz, Ramazan ayının və onun fəzilətinin savabını dərk etməyimiz tövsiyə olunur.

Adından da məlum olduğu kimi, Qədr gecəsi qədir, dəyər, qədər mənasındadır. Həmin gecədə Allahu-təala bütöv "Quran"ı Peyğəmbərin qəlbinə nazil edib.

Rəsulullah həmin gecə yatmayıb, sübhə qədər oyaq qalıb və Allahdan gələn vəhyi qəbul elib. Təbii ki, Qədr gecəsində oyaq qalıb əhya saxlamaq, dua edib, ibadətlə məşğul olmaq savabdır. Bu gecənin öz ibadətləri var.

Qədr gecəsi böyük və dəyərli bir gecədir. Dediyimiz kimi, insan bu mübarək ayın hər gecəsini Qədr gecəsi bilməlidir, amma bacarmasa, heç olmasa, son 10 günü əhya saxlaması bəyənilir. "Quran"ın da dediyi kimi, bu gecə min aydan daha xeyirlidir. Başqa aylarda belə bir gecə yoxdur.

Alimlərin nəzərinə əsasən, biz 4 gecəni vəhdət olaraq qərarlaşdırıb məscidlərimizdə Qədr gecəsi kimi qeyd edirik: 19-cu, 21-ci, 23-cü və 27-ci günlərin gecəsi.

Allah Ramazan gecələrimizi və gündüzlərimizi fəzilətli, bərəkətli etsin, dualarımızı qəbul etsin".

ZAİRA AKİFQIZI

Telegramda izləyin