Məişət zorakılığına qarşı ölkədə hansı işlər görülür? - AÇIQLAMA-ÖZƏL

İstiqamət: Gender, ailə və demoqrafiya məsələlərinin işıqlandırılması

Qadınlara, qız uşaqlarına qarşı zorakılıqlar hər gün daha geniş vüsət almağa davam edir. İl ərzində Azərbaycanda da, bütün dünyada da qadınlara və qızlara qarşı məişət zəminində zorakılıq halları barədə daxil olan məlumatlar dəfələrlə artıb. Bəs bununla bağlı ölkədə hansı işlər görülür?

Mövzuyla bağlı Sonxeber.az-a Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyinin İctimaiyyətlə əlaqələr və kommunikasiya şöbəsinin rəhbəri Murad Həşimov açıqlama verib.

O bildirib ki, çalışdığı qurum məişət zorakılığından əziyyət çəkən insanlar üçün də xüsusi fəaliyyətlə məşğuldur:

"Təəssüf ki, cəmiyyətdə müxtəlif hadisələr baş verir. Yəni tək qadın yox, bəzən kişi zorakılığı da ola bilər və təbii ki, mən istənilən zorakılıq hallarına qarşıyam. Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyinin həssas əhali qrupundan olan şəxslər üçün sığınacaq və sosial reabitilasiya müəssisəsi var. Burada məişət zorakılığından zərər çəkmiş şəxslərlə bağlı bir şöbə var, ötən ilin iyul ayından fəaliyyət göstərir. Həmin şöbədə məhz bu formada zərər görən şəxslərin reabitilasiyası, cəmiyyətə qazandırılması həyata keçirilir.

İnsanlar birbaşa hüquq mühafizə orqanlarına və ya digər qeyri-hökumət təşkilatlarına müxtəlif formada müraciət edə bilərlər. Yetər ki, biz hadisələrdən xəbər tutandan sonra onlara əl tutmaq niyyətimizi qəbul etsinlər, biz də dəstək göstərə bilək.

Bundan əlavə, Sosial Xidmətlər Agentliyinin "116123" - Qayğı Çağrı Mərkəzi də artıq fəaliyyət göstərir".

Material Azərbaycan Respublikasının

dəstəyi ilə hazırlanmışdır.

Aysel SƏFƏRZADƏ

Telegramda izləyin