Qarabağda antiterror əməliyyatı başlaya bilər? - Deputatdan CAVAB

Son günlər erməni silahlı birləşmələrinin təxribatları davam etməkdədir. Bu təxribatlar dayandırılmasa, Qarabağda antiterror əməliyyatı başlaya bilərmi?

Bununla bağlı Sonxeber.az-a danışan deputat Nəsib Məhəməliyev bildirib ki, son zamanlar Ermənistan silahlı qüvvələri tərəfindən atəşkəs rejiminin pozulması məqsədli xarakter daşıyır:

"Ermənistan üçtərəfli razılaşmalardan irəli gələn öhdəlikləri yerinə yetirməkdən boyun qaçırır və sülh müqaviləsinin imzalanmasını ləngidir. Konkret olaraq, Qarabağdan silahlı terrorçu qrupların çıxarılmasını təmin etmir, Zəngəzur dəhlizini, kommunikasiyaları açmır, sərhədlərin delimitasiya və demarkasiya proseslərindən yayınmaqla vaxt udmağa çalışır. Bəzi xarici qüvvələrin dəstəyi ilə, mənasız bir qurum olan Minsk qrupunu dövriyyəyə qaytarmağa cəhd edir. Avropa İttifaqının vasitəçiliyi ilə keçirilən görüşdən əvvəl, Azərbaycanın irəli sürdüyü beş şərtlə razılaşmasına baxmayaraq, Ermənistan destruktiv fəaliyyətini davam etdirməklə məşğuldur.

Belə davam edə bilməz. Biz oturub ermənilərin yenidən təşkilatlanmasını gözləyə bilmərik. Prezident İlham Əliyev altı ayın yekunlarını müzakirə edərkən növbəti dəfə ermənilərə xəbərdarlığını etdi və 10 noyabr bəyannaməsinin bütün müddəalarının icrasını təmin etməli olan Rusiyaya da öhdəliklərini xatırlatdı. Əks halda, beynəlxalq hüquq imkan verir ki, Azərbaycan öz ərazisində antiterror əməliyyatları keçirsin".

Düputat vurğulayıb ki, indiki vəziyyətdə Zəngəzur dəhlizinin açılmasının əhəmiyyəti olduqca böyükdür:

"Rusiya-Ukrayna müharibəsi fonunda, Qərb-Rusiya münasibətlərinin yaxın gələcəkdə normallaşması mümkünsüz görünür. Şərqlə Qərbi birləşdirən ən qısa quru yolları isə Azərbaycandan keçdiyi üçün ölkəmizin nəqliyyat-logistik imkanları bütün tərəflərin maraqlarına cavab verir. Lakin, əfsuslar olsun ki, burada cənub qonşumuzun Zəngəzur dəhlizinin açılmasına qarşı təhdidlərini anlamaq mümkün deyil.

Azərbaycanın apardığı hücum diplomatiyası Ermənistanı küncə sıxışdırıb. Onların öhdəlikləri yerinə yetirməkdən başqa çıxış yolları yoxdur. Əgər yaxın zamanlarda, normallaşma istiqamətində konkret addımlar atılmasa, Azərbaycan Ordusu konstitusiyadan irəli gələn vəzifələri icra edəcək.

Bir daha deyirəm, ermənilərin yenidən təşkilatlanmalarını gözləmək, sadəlövhlükdür. Terrorçular Qarabağdan bir dəfəlik çıxarılmalı, kommunikasiyalar açılmalıdır".

Aysel Yusifqızı

Telegramda izləyin