"Bu gün Azərbaycanın təhsil sistemi XXI əsrin çağırışlarına cavab verir" - Deputat

Xəbər verdiyimiz kimi, Azərbaycan Respublikası Təhsil Nazirliyinin adı dəyişdirilərək Elm və Təhsil Nazirliyi adlandırılıb. Bundan əlavə, Azərbaycan Respublikasının Elm və Təhsil Nazirliyi yanında iki agentlik yaradılıb. Bununla bağlı Azərbaycan Respublikasının Prezidenti İlham Əliyev fərman imzalayıb. Fərmana əsasən, Elm və Ali Təhsil üzrə Dövlət Agentliyi və Məktəbəqədər və Ümumi Təhsil üzrə Dövlət Agentliyi yaradılıb.

Bununla bağlı Sonxeber.az-a danışan deputat Cavanşir Paşazadə bildirib ki, cənab Prezident İlham Əliyevin imzaladığı fərman və atdığı addımların hər biri ölkəmizin uğurlu gələcəyinə hesablanıb:

"Eləcə də iyulun 28-də təhsil sahəsinin inkişafına hesablanmış fərman. Yeni yaradılan agentlik təhsilin inkişafı ilə yanaşı, həm də illərdir həll edilməyən problemlərin ortadan qalxmasına kömək edəcək.

Heç kəsə sirr deyil ki, cənab Prezident İlham Əliyev ölkə başçısı seçildiyi gündən bu günə bütün sahələrin inkişafı ilə bağlı çox mühüm qərarlar qəbul edib, fərman və sərəncamlar imzalayıb. Məhz atılan bu addımlar sayəsində Ali Baş Komandan İlham Əliyevin rəhbərliyi ilə Müzəffər Azərbaycan Ordusu 44 günlük Vətən müharibəsində düşməni darmadağın edib möhtəşəm qələbə qazanaraq ərazi bütövlüyümüzü bərpa edib".

Deputat qeyd edib ki, bir ölkənin uğurlu inkişafı onun təhsilindən asılıdır:

"Eləcə də təhsilin inkişafı hər bir ölkədə inkişaf konsepsiyasının mühüm tərkib hissəsidir. Cənab Prezident İlham Əliyevin təhsilin inkişafına göstərdiyi diqqət və qayğı onu təsdiqləyir ki, bu mühüm amil dövlət siyasətinin mühüm strateji istiqamətlərindən biri və bəlkə də ən başlıcasıdır. Prezident İlham Əliyev, Birinci vitse-prezident Mehriban xanım Əliyeva və Heydər Əliyev Fondu tərəfindən hər zaman bu sahəyə diqqət və qayğı ön planda olub. Məhz buna görə də cənab Prezident İlham Əliyev və Birinci vitse-prezident Mehriban xanım Əliyeva yeni tikilən məktəblərin, bağçaların, uşaq evlərinin, şəhid ailələri üçün binaların açılış mərasimlərində iştirak edirlər. Bu da onu göstərir ki, ölkə rəhbərliyi üçün vətəndaşların yaşayış şəraitinin yaxşılaşdırılması, yüksək təhsil alması prioritet istiqamətdir. Məhz buna görə də bu gün Azərbaycanın təhsil sistemi XXI əsrin çağırışlarına cavab verir.

Düşünürəm, təhsil ölkəmizin ümumi inkişafına uyğun şəkildə inkişaf etməlidir və ən müasir tələblərə cavab verməlidir. Hesab edirəm ki, Prezident İlham Əliyevin iyulun 28-də imzaladığı fərmanlar bunun bariz nümunəsidir. Bu fərmanlar, həmçinin, təhsil sahəsinin daim dövlətin və dövlət başçısının diqqət mərkəzində olduğunu bir daha sübut etdi".

Aysel Yusifqızı

Telegramda izləyin