Laçının intiharına səbəb olan atanı hansı cəza gözləyir?

Şərur rayonunun Zirvə kənd sakini Laçın Ümman qızı Rzayeva imtahan nəticələrinin zəif olduğu üçün valideynlərinin təzyiqlərinə dözməyərək intihar edib.
17 yaşlı gənc intihardan əvvəl sosial şəbəkədə paylaşım edib. Paylaşıma əsasən, ata evdən çıxarkən "Mən işdən qayıdınca özünü öldür" deyib, övladı isə bunu ciddi qəbul edib.

Mövzu ilə bağlı Sonxeber.az saytına vəkil Anar Ramazanov açıqlama verib.

O bildirib ki, mərhum şəxs intihardan əvvəl hər şeyi açıq-aşkar yazıb.Bu da o deməkdir ki, valideynlər məsuliyyətə cəlb oluna bilər. Övlad valideyndən həm maddi, həm də psixoloji baxımdan asılıdır. Görünür ki, imtahanda zəif nəticə göstərdiyi üçün onu mütəmadi məzəmmət ediblər və nəticədə gənc buna dözə bilməyib canına qəsd edib.

"Təbii ki tək bu paylaşımla valideyni tutmurlar. Hər bir halda araşdırma gedəcək. Cinayət məcəlləsinin 125-ci maddəsinə əsasən, bununla bağlı həmin şəxs məsuliyyətə cəlb oluna bilər. Özünü öldürmə həddinə çatdırma cinayət qanunvericiliyində müəyyən olunur ki, təqsirkardan asılıdır. Zərərçəkmiş şəxslə amansız rəftar etmə, hədə-qorxu gəlmə, ləyaqətini mütəmadi alçaltmaq, özünü öldürmə həddinə çatdırma əməli 3 ildən 7 ilə qədər müddətə qədər azadlıqdan məhrum etmə ilə cəzalandırılır".
Qeyd edək ki, polis məsələ ilə bağlı araşdırma tədbirlərinə başlayıb.
AYSEL QULİYEVA

Telegramda izləyin