Azərbaycanda selektiv abort ləğv edilə bilər?

Azərbaycan dünyaya gələn uşaqların cins nisbətinə görə selektiv aborta üstünlük verən dövlətlər arasında birinci yerdədir. 2021-ci ilin statistikasına əsasən, Azərbaycanda 100 qıza 115 oğlan düşür.

Mövzu ilə bağlı Sonxeber.az saytına sabiq deputat Sona Əliyeva açıqlama verib.

O bildirib ki, selektiv abort demoqrafik göstəricilərə çox ciddi təsir eləyir. Bunun qarşısı alınmasa, gələcəkdə problemlər yarana bilər.
"Dünya statistikasına əsasən, qadınların sayı kişilərin sayından çoxluq təşkil edir. Bizdə isə bu tərsinədir. Bununla bağlı maarifləndirmə işləri aparılmalı və ciddi şəkildə qanunlara riayət olunmalıdır. Düşünürəm ki, qanunvericilikdə bu məsələ bir qədər sərtləşdirilərsə, bunun qarşısını almaq olar".

Qeyd edək ki, ötən gün media eksperti Aynur Veysəlova "Azərbaycan mediasında gender həssaslığının artırılması" mövzusunda jurnalistlər üçün keçirilən təlimdə çıxışı zamanı bu məsələyə toxunub.

"BMT-nin Əhali Fondunun hesablamalarına görə, Azərbaycanda doğulan uşaqlar arasında cinsə görə nisbətin ciddi şəkildə pozulması davam etsə, 2050-ci ilə qədər hər il doğulan oğlan uşaqlarının sayı qız uşaqlarının sayından 12 000-15 000 nəfər çox olacaq. Cəmiyyətdə kişilərin sayının bu artımla davam etməsi ölkənin acınacaqlı nəticələrlə üz-üzə qalması halına gətirib çıxara bilər. Bura gender bərabərsizliyi, zorakılıq, erkən nikah, insan alveri və kriminal səviyyənin artması aiddir. Bu vəziyyətlə qarşılaşmaq istəmiriksə, qızlara dəyər vermək lazımdır. Ədalətli cəmiyyət naminə qızlar üçün bərabər imkanlar yaradılmalıdır".
AYSEL QULİYEVA

Telegramda izləyin