"Düşünmürlər ki, başlarını bəlaya salırlar" - Nigar Şabanova

Əməkdar artist Nigar Şabanova hərbi qulluqçuların TikTok-da canlı yayıma çıxmaları səbəbindən ordu sıralarından xaric edilmələrinə münasibət bildirib.

Axşam.az xəbər verir ki, sənətçi bu addımın doğru olduğunu vurğulayıb. O, hərbçiləri bu tip hərəkətlərdən çəkinməyə çağırıb:

"Düz ediblər, digərlərinə də dərs olsun. Bəziləri xidmət yox, qız ovundadır. Düşünmürlər ki, başlarını bəlaya salırlar. Analarınıza, cavan canınıza yazığınızı gəlsin. Ümidimiz sizsiniz. Peşənizi dəyərdən salmayın. Siz ən uca peşənin sahiblərisiniz, baş tacımızsınız. Hansısa səviyyəsini itirən qızlara özünüzü reklam edəcəksiniz deyə can qoyduğunuz işinizdən olmayın".

Qeyd edək ki, kiçik çavuş Fərəcov Sənan Məhəmməd oğlu və əsgər Bayramlı Yusif Eldar oğlunun Müdafiə Nazirliyi rəhbərliyinin müvafiq əmr və sərəncamlarına zidd olaraq xidmət zamanı smartfon tipli telefonlardan istifadə etmələri və xidmətə aid foto-video görüntüləri şəxsi sosial şəbəkə hesablarında paylaşmaları aşkar edilib. Bu səbəbdən onlar xidməti uyğunsuzluğa görə ordu sıralarından çıxarılıb.

Onu da qeyd edək ki, N.Şabanovanın həyat yoldaşı Xəyyam da hərbçidir.

Telegramda izləyin