"Birinci kurs tələbələrinə təhsil haqqının ödənilməsində müəyyən güzəştlər olunmalıdır" - Deputat

Xəbər verdiyimiz kimi, Dövlət İmtahan Mərkəzi 2022/2023-cü tədris ili üçün Azərbaycan Respublikasının ali təhsil müəssisələrinə yerləşdirmənin nəticələrini elan edib. Qeyd edək ki, 23044 (o cümlədən 253 subbakalavr) nəfər dövlət sifarişi əsasında, 25797 (o cümlədən 4674 subbakalavr) nəfər isə ödənişli əsaslarla təhsil alacaq. Lakin ali məktblərdə təhsil haqqı yüksək olduğundan bəzi tələbələr ödənişli əsaslarla oxumaqdan imtina edirlər".

Bu sözləri Sonxeber.az-a danışan deputat Cavanşir Paşazadə deyib.

Onun sözlərinə görə, hər bir valideyn, övladının ali təhsil almasını arzulayır, amma universitetlərdə təhsil haqqı yüksək olduğundan onun ödənişli əsaslarla ali təhsil almasından imtina edir:

"Düşünürəm ki, bu məsələdə ali təhsil müəssisələri tələbələrə güzəşt etməlidir, əsas da birinci kursda. Çünki birinci kursda təhsil haqqının bütöv şəkildə ödənilməsi tələb olunur və lazım olan məbləği ödəyə bilməyən tələbə universitetə getməkdən imtina etməli olur. Bu hallar hər birimizi üzür. Mənim özümə də bununla bağlı müraciətlər olur.

Təklif edirəm ki, digər kurslarda olduğu kimi, birinci kursda da tələbələr təhsil haqqını hissə-hissə ödəsinlər. Belə olarsa, tələbələrimiz məcbur olub, ali təhsil almaqdan imtina etməli olmazlar".

Deputat qeyd edib ki, övladlarının həvəsi başqa sahəyə olsa da, valideynlər bəzən onu istəmədiyi ixtisas üzrə ali təhsil almağa məcbur edirlər:

"Bəlkə də, övladı gələcəkdə istedadlı dərzi, rəssam, aşpaz və ya başqa sahənin mütəxəssisi ola bilər. Amma bəzi valideynlərdəki eqo və başqaları ilə rəqabət hissi gənclərin arzularının reallaşmasına imkan vermir.

Düşünürəm ki, ixtisas seçimində valideynlər övladlarına təzyiq etməməli, hansı sahəni seçməklərindənn asılı olmayaraq, ona dəstək olmalıdırlar. Bəzən yersiz təzyiqlər gənclərimizin yanlış istiqamətlənməsinə səbəb olur. Ona görə də valideynlərimiz çalışmalıdırlar ki, övladları arzuladıqları sahənin mütəxəssisi olsunlar. Əks təqdirdə, övladlarını almağa məcbur etdikləri diplom sadəcə onların eqosunu tətmin etməkdən başqa bir şeyə yaramaz".

Aysel Yusifqızı

Telegramda izləyin