"Azad edilmiş ərazilər iqtisadi güc mənbəyi kimi ölkə iqtisadiyyatında xüsusi paya malikdir" - Deputat

"Tarixi Zəfərdən sonra Azərbaycan hökuməti cənab Prezident İlham Əliyevin rəhbərliyi altında işğaldan azad edilən ərazilərdə sürətlə geniş quruculuq işləri aparır, infrastrukturun bərpası, həmin ərazilərdə iqtisadi layihələrin həyata keçirilməsi üçün davamlı tədbirlər görür. Əsas məqsəd bu bölgənin milli iqtisadiyyata sürətli inteqrasiyasını təmin etmək, zəngin iqtisadi resurslarını inkişafa yönəltmək və bölgənin əhalisinin layiqli və keyfiyyətli sosial həyat tərzini qurmaqdır. Bu məqsədlə dövlət başçısı tərəfindən yaradılmış Qarabağ və Şərqi-Zəngəzur iqtisadi rayonlarında ən müasir iqtisadi layihələrin icrası və xarici investorların cəlb olunması üçün addımalr atılmaqdadır".

Bu sözləri Sonxeber.az-a Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov deyib.

Deputat söyləyib ki, işğaldan azad edilmiş ərazilərin ölkə iqtisadiyyatına reinteqrasiyası, investisiya cəlbediciliyinin artırılması, müasir və effektiv istehsal, ticarət və xidmət infrastrukturunun yaradılması, innovativ texnologiyaların tətbiqi, sənaye potensialının reallaşdırılması, optimal güzəştlərin və stimullaşdırıcı mexanizmlərin hazırlanması həyata keçirilib:

"Cənab Prezidentin imzaladığı "İşğaldan azad edilmiş ərazilərdə iqtisadi inkişafın sürətləndirilməsi ilə bağlı bəzi tədbirlər haqqında" Sərəncam həmin məqsədlərə çatmaq üçün "yol xəritəsi" hesab edilə bilər. Hazırda minalardan təmizlənmiş ərazilərdə ilk layihələrin təməli qoyulub, Qubadlı və Kəlbəcərdə arıçılıq və heyvandarlıq təsərrüfatları qurulub, Füzuli Beynəlxalq Hava Limanı istifadəyə verilib, nəqliyyat və sosial infrastrukturları dayanmadan gecə-gündüz qurulmaqdadır. Bu mənzərə bütün xarici investorların bölgəyə həvəsini artırır. Məhz bu məqsədlə hökumət onlara iqtisadi stimullar vermək, vergi-gömrük güzəştləri tətbiq etmək niyyətindədir. Dövlət başçısının müvafiq Sərəncamı da həmin strateji hədəflərə hesablanıbdır".

A.Hüseynov bildirib ki, azad edilmiş ərazilərdə iqtisadi proqramların həyata keçirilməsi ölkə iqtisadiyyatına öz mühüm töhfəsini verəcək:

"Qarabağ və Şərqi-Zəngəzurda Türkiyə, Cənubi Koreya, İsrail, Macarıstan, İtaliya və digər ölkələrə məxsus şirkətlər sərmayə qoymaq niyyətindədir. Bu bölgədə Azad İqtisadi Zona yaradılıb və Rusiyanın "Kamaz" şirkəti artıq ilk investor kimi qeydiyyatdan keçib. Cənubi Koreyanın Ticarət və İnvestisiyaların Təşviqi Agentliyi işğaldan azad olunmuş ərazilərimizdə "Yaşıl" iqtisadiyyat quruculuğunda iştirak etmək istəyir. "Yaşıl enerji" zonası İtaliya, Cənubi Koreya, Türkiyənin da marağı böyükdür. Türkiyə şirkətləri Laçın və Kəlbəcər rayonlarında bərpa olunan enerji layihələrinin iqtisadi əsaslandırma planını hazırlayıb və külək elektrik stansiyalarının inşası başlanacaq. Yeri gəlmişkən, Türkiyə şirkətləri işğaldan azad edilmiş ərazilərdə artıq sərmayə proqramlarının icrasına başlayıb. Türkiyənin "Eti Bakır A.Ş." şirkəti Qaşqaçay filiz yatağında, "Artvin Maden A.Ş." şirkəti Elbəydaş və Ağduzdağ filiz yataqlarında neçə aydır ki, fəaliyyət göstərir.

Beləliklə, işğaldan azad edilmiş ərazilər iqtisadi güc mənbəyi kimi ölkə iqtisadiyyatında əlavə dəyərin yaradılmasında xüsusi rola malik olacaq. Həmçinin, bu ərazilərdə daha iki beynəlxalq aeroportun, ölkəmiz üçün həm strateji, həm də iqtisadi əhəmiyyətə malik olan və Zəngəzur dəhlizinin istifadəyə verilməsi güclü turizm və tranzit potensiallarını da artıracaq".

Aysel Yusifqızı

Telegramda izləyin