Üç yaşlı uşaq anası tərəfindən şiddət görür? - VİDEO

Abşeron rayonunda üç yaşlı uşağın şiddət gördüyü iddia edilib.

Bu barədə Oxu.Az-ın redaksiyasına şikayət ünvanlanıb.

İddia edilib ki, rayonun Masazır qəsəbəsi, "Qurtuluş-93" ünvanında ana hər gün uşağına işgəncə verir.

Abşeron Rayon İcra Hakimiyyətindən Oxu.Az-a bildirilib ki, məsələ barədə ünvana baş çəkilərək lazımi tədbirlər görüləcək:

"Bundan əvvəl də uşaqla bağlı qanunamüvafiq tədbirlər görülüb".

Daxili İşlər Nazirliyindən isə saytımıza bildirilib ki, uşağın işgəncə görməsi ilə bağlı Abşeron Rayon Polis İdarəsinə müraciət edilməyib.

Qeyd edək ki, uşağa şiddət göstərdiyi iddia edilən qadının 1984-cü il təvəllüdlü, Abşeron rayonu, Masazır qəsəbəsində yaşayan Bəhrəmova Jalə Bəhrəm qızı olması bildirilir. Bir müddət əvvəl qadının uşağının baxımsız vəziyyətdə qaldığı və uzun müddət yuxu dərmanlarının təsiri altında olduğu aşkarlanmışdı. Abşeron Rayon İcra Hakimiyyətinin nümayəndələri tərəfindən azyaşlı Azərbaycan Uşaqlar Birliyi - Uşaq Sığınacağı Reinteqrasiya Mərkəzinə yerləşdirilmişdi.

Həmin qadın Bakıda sığınacaq qarşısında uşağının oğurlandığını iddia etmişdir. Qadına təyin olunmuş diaqnoz "Psixiatriya yardımı haqqında" Azərbaycan Respublikasının qanununa əsasən, xəstənin psixiatriya stasionarında qeyri-könüllü yerləşdirilməsinə əsas vermədiyi üçün Jalə Bəhrəmova evə yazılıb.

Telegramda izləyin