"Paşinyan Ermənistandan kənarda və ölkə daxilindəki revanşist qüvvələr ilə hərəkət edir" - Kamilə Əliyeva

Azərbaycan- Ermənistan sərhədində son iki gündür ki, atışma olur. Bununla bağlı Sonxeber.az-a açıqlama verən Milli Məclisin deputatı Kamilə Əliyeva bildirib ki, Ermənistan isə 2 ilə yaxın vaxt keçməsinə baxmayaraq, hər cür bəhanə gətirərək öz üzərinə düşən öhdəlikləri yerinə yetirməkdən boyun qaçırır:

"Azərbaycan-Ermənistan təmas xəttində ermənilərin törətdiyi təxribat bir daha Ermənistan rəhbərliyinin ikiüzlü, riyakar siyasət yeritdiyini sübuta yetirdi. Azərbaycan tərəfi 10 noyabr 2020-ci il bəyanatının bütün bəndlərinə uyğun olaraq öz üzərinə düşən öhdəlikləri yerinə yetirir. Ermənistan isə 2 ilə yaxın vaxt keçməsinə baxmayaraq, hər cür bəhanə gətirərək öz üzərinə düşən öhdəlikləri yerinə yetirməkdən boyun qaçırır. Ermənistan rəhbərliyinin bu hərəkətləri üçtərəfli bəyanatdan imtina etməsi anlamına gəlir. Kapitulyasiya aktına imza atan Ermənistan imdad üçün Avropa İttifaqına üz tutdu. Prezident cənab İlham Əliyevin düşünülmüş müdrik xarici siyasəti nəticəsində Paşinyan ağır məğlubiyyətə uğradı. Avropa Şurasının prezidenti Şarl Mişelin vasitəçiliyi ilə üçtərəfli görüşlərdə də Azərbaycanın maraqları nəzərə alınmaqla Avropa İttifaqı rəsmisi səsləndirib ki, Ermənistan Azərbaycanın irəli sürdüyü 5 bənddən ibarət təklifi qəbul etdiyini bildirdi və sülh sazişinin imzalanması istiqamətində Azərbaycan və Ermənistan xarici işlər nazirlərinin görüşməsi, hazırlıq işlərinin başlanması üçün öz razılığını bildirmişdi. Ermənistan rəhbərliyinin bu razılaşmanın tələblərini yerinə yetirməməsi açıq-aşkar görünür. Yəni bu gün Ermənistan dövləti müstəqil dövlət deyil. Ermənistan rəhbərliyi müstəqil siyasət yeritməyi bacarmayan səriştəsiz siyasətçilərdən ibarətdir. Bu gün Ermənistanın baş naziri Paşinyan Ermənistandan kənarda və ölkə daxilində revanşist qüvvələr ilə hərəkət edir. Müzəffər Ali Baş Komandanımız Azərbaycan Respublikasının Prezidenti İlham Əliyev dəfələrlə Ermənistan rəhbərliyinə və Ermənistanın xaricdəki havadarlarına Azərbaycana qarşı nəinki silahlı təxribat törədilərsə, hətta təxribat xarakterli bəyanatlar verilərsə, nəticəsinin ağır olacağını bildirib. Ermənilərin dünən törətdikləri hərbi təxribatın qarşısını Azərbaycan ordusu aldı və Ermənistan ordusunun təmas xəttinə yaxın daha dərinliklərindək hərbi texnikasını, canlı qüvvələrini məhv etdi.Həyata keçirilmiş uğurlu əməliyyatlar nəticəsində Azərbaycan ordusu təxminən 100 kvadrat kilometr irəliləyərək yüksəklikləri ələ keçirdi. Bu, iki dövlət tərəfindən delimitasiya olunmayan ərazilər sayılır. Bu gün Azərbaycan silhalı qüvvələri Xankəndindən Ermənistana, Qafandan İrəvana gedən yolları nəzarətə ələ keçirib. Bu döyüşdə də Azərbaycan ordusu şəhidlər verdi, oğullarımız yenə də Ermənistanə hərb meydanında diz çökdürdü.7 saatlıq döyüşdə Azərbaycan ordusu Ermənistan silahlı qüvvələrini darmadağın etdi və ilkin məlumatlara görə Ermənistanda ölənərin sayı 150-200 nəfərdir. Xeyli erməni diversant əsir götürüldü. Bu hərbi qələbəmizdə Azərbaycan bir daha dünyaya bəyan etdi ki, Azərbaycanın ərazi bütövlüyünə təhlükə yaranarsa, Azərbaycan əsgəri qətlə yetirilərsə, cavabları ağır olacaq. Sonda bir daha şəhidlərimizə Allahdan rəhmət, əzizlərinə səbr diləyirəm . Bütün xalqımıza başsağlığı verirəm.Vətən sağ olsun".

Şəbnəm Lətifi

Telegramda izləyin