Əli Kərimli də, Altay Göyüşov da erməni dili ilə danışırlar – Aydın Hüseynov

"Azərbaycan 200 illik düşməni və onun arxasında duran güclərlə ölüm-dirim savaşı aparır, haqqını tələb edir, pozulmuş suveren hüquqlarını, ərazi bütövlüyünü bərpa etməyə çalışır. Bu çətin və məsuliyyətli işin başında da Azərbaycan dövlətinin başçısı, Ali Baş Komandan İlham Əliyev dayanır. 30 illik sülh danışıqları nəticə vermədiyindən xəbərdarlıqlara uyğun olaraq Azərbaycan Ermənistan silahlı qüvvələrinin nəzarətində olan ərazilərimizi güc yolu ilə, silahla, hərbi vasitələrlə işğaldan azad edib. Amma sülh müqaviləsinin imzalanması üçün Ermənistana təzyiq etməmək də mümkün deyil. Bunun üçün bəzən hərbi əməliyyatların keçirilməsi zərurəti də yaranır. Bütün bunlara rəğmən həm Ermənistanın ta əvvəldən yanında duranların, ona bütün anlamda dəstək olanların, həm də içimizdə olan xainlərin səsi eşidilməkdədir".

Bunu açıqlamasında Milli Məclisin deputatı Aydın Hüseynov deyib.

Millət vəkili bildirib ki, xarici və daxili düşmənlərimizə, xəyanətkarlara qarşı xalqın bir yumruq kimi birləşməsi gərəkdir: "Bizim işimiz haqqdır, biz torpaqlarımızın bütövlüyünü istəyirik, BMT-nin sənədlərində təsbit olunmuş sərhədlər çərçivəsində suveren hüquqlarımızın, ərazi bütövlüyümüzü bərqərar olmasına çalışırıq. Bu yolda kim olursa olsun, hansı güclər gəlirsə gəlsin milli maraqlarımızdan geri duran deyilik. Buna baxmayaraq daxildəki bir sıra ünsürlər Azərbaycana dil uzatmağa başlayıblar. Özünü "ana müxalifət" adlandıran, əməlləri xalqın maraqları ilə daim ziddiyyət təşkil edən, erməni dəyirmanına su tökmək peşəsini davam etdirən, Azərbaycanın əlehinə atdığı addımlarla xüsusən erməni cəmiyyətinin məhək daşına çevrilən Əli Kərimli, özünü beynəlxalq ekspert kimi ermənipərəst dairələrdə tanıdan və əsasən erməni mətbuatının "dəqiq mənbə" olaraq daim istinad etdiyi Altay Göyüşlü, xaricdə outrub social şəbəkələr vasitəsilə Azərbaycana, onun rəhbərliyinə ermənilərin belə deyə bilməyəcəyi yalanlar tirajlayan, milli hissiyatımızla oynayan, daha çox "söyüş mühacirləri" adı ilə tanınan ünsürlər ölkəmizə qarşı qarayaxma kampaniyası aparırlar. Əli Kərimlinin də, Altay Göyüşovun və digər yaramazların apardığı təbliğatla bu gün İrəvanın küçələrində Azərbaycana qarşı hədyanlar səsləndirən ermənilər arasında heç bir fərq yoxdur. Hər ikisinin fikirləri yanlış, qərəz, xəyanət üzərində qurulub. Altay Göyüşov Azərbaycanın Ermənistan silahlı qüvvələrinin təxribatçı əməllərinə qarşı apardığı əməliyyatı təcavüz adlandırırsa, bunu ermənidən nə fərqi? Əgər Əli Kərimli Azərbaycanın Qarabağ separatçılarına, təcavüzkar Ermənistana olan münasibətini insan haqlarının pozulması kimi yozursa bu şəxsin Azərbaycanda yaşamağa, hətta müxalifət adından danışmağa haqqı çatırmı? Ermənidən betər erməni olmağa çalışan bu şəxslərin bir məqsədi var, suyu bulandırmaq, Ermənistanın və digər ölkələrdəki siyasi dairələrin, bəzi mərkəzlərin tərtibatı ilə hakimiyyətə gəlmək, həmçinin Azərbaycanın beynəlxalq imicinə zərər vurmaq. Əslində, daxili düşmənlərimiz Əli Kərimli də, Altay Göyüşov da yeni heç nə demirlər, sadəcə, erməni dili ilə, erməni tərtibinə uyğun danışırlar".
Aysel Yusifqızı

Telegramda izləyin