Azərbaycanda hərbi vəziyyət və səfərbərlik elan olunacaq? - AÇIQLAMA

Xəbər verdiyimiz kimi, sentyabrın 12-də erməni silahlı birləşmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədiblər. Genişmiqyaslı təxribatın qarşısı alınarkən Azərbaycan Ordusundan 42, Dövlət Sərhəd Xidmətindən isə 8 hərbi qulluqçu olmaqla, ümumilikdə Silahlı Qüvvələrin 50 hərbi qulluqçusu şəhid olub.

Ermənilərin təxribatlara əl atması Azərbaycan tərəfini qətiyyətli tədbirlər görməyə vadar edir. Yenidən müharibənin başlayacağı və ölkədə hərbi vəziyyətin elan olunacağı, komendant saatının tətbiq olunacağı ilə bağlı fikirlər səsləndirilir. Bu iddialar nə dərəcədə doğrudur?

Məsələ ilə bağlı hərbi ekspert Üzeyir Cəfərli BiG.AZ-a açıqlmasında bildirib ki, bu fikirlər əsassızdır və ölkədə hərbi vəziyyət və səfərbərlik elan olunmayacaq:

"Heç bir halda səfərbərlik elan olunmayacaq. Kifayət qədər hərbi resursumuz var, hərbi hissələrimiz, Azərbaycan Müdafiə Nazirliyi, Dövlət Sərhəd Xidməti və digər qoşun birləşmələrimiz hazır vəziyyətdədir. Heç kim də çaşqınlıq yaratmasın. Bəzi işbazlar insanlar arasında müəyyən ajiotaj yaratmaq istəyirlər. Səfərbərlik o vaxt lazım idi, çünki o vaxt bizim böyük bir ərazimizi düşməndən geri almağımız lazım idi. İndi balaca bir ərazi qalıb, onu da Xüsusi Təyinatlı Qüvvələrimiz, Komando hərbi hissələrimiz qısa müddətdə bir neçə günə azad etmək gücündədir və ehtiyat güvvəmiz də yetərincədir.

Ona görə də heç bir narahatlıq yoxdur. O ki qaldı münaqişəni alovlandıran səbəblərə, Ermənistanı başa salmalıdırlar ki, odla oynamasın. Ermənistana məsləhət görməzdim ki, bu məsələni dərinləşdirsin. Ermənistan bu təxribatı həyata keçirir və buna görə də layiq olduğu cavabı alıb və almaqda da davam edir.

Bu gün də Azərbaycana çağırış edən beynəlxalq qurumlar özlərinə sual versinlər ki, işğalçı statusunda olan Ermənistan əsgərinin Azərbaycan ərazisində nə işi var? Niyə 28 ildən artıq müddətdə balaca bir Ermənistan BMT sənədlərinə və qərarlarına əhəmiyyət vermir? Ermənistan kimi işğalçıya yalnız güc tətbiq etmək lazımdır. Biz 2020-ci ildə də bütün dünyaya bunu göstərdik. İndi də eyni gücü göstərmək lazımdır ki, Ermənistanın ağlı başına gəlsin.

Ermənistanı bu avantüraya şirnikləndirən dövlətlər gəlib Ermənistan ərazisində ermənilərin əvəzinə döyüşən deyil. Ermənistan Azərbaycanla qonşuluq münasibətlərində normal yaşamaq istəyirsə, ağlını başıma yığmalıdır. Hələlik görünən odur ki, Ermənistan "göylə gedir", ancaq Azərbaycan Ordusu onu aşağı endirməklə məşğuldur. Çünki itkilərinin sayı çoxalmağa doğru gedir. Bizim də itkilərimiz var, biz bunu heç vaxt gizlətməmişik və gizlətmirik. Hətta Azərbaycan Müdafiə Nazirliyi və Dövlət Sərhəd Xidməti şəhid olmuş əsgər və zabitlərin siyasını da dərc edib. Ona görə də beynəlxalq qurumlar narahatlığı Ermənistanla bağlı dilə gətirilməlidir, Azərbaycanla bağlı hər hansı bir narahatlıq yoxdur".

Telegramda izləyin