"Bütün bunlar Azərbaycan diplomatiyasının qələbəsidir"- DEPUTAT

"Şanxay Əməkdaşlıq Təşkilatı çərçivəsində Azərbaycan və Rusiya Federasiyasının Prezidentləri İlham Əliyevlə, Vladimir Putin arasında görüş baş tutdu".

Bunu Sonxeber.az-a açıqlamasında deputat Nəsib Məhəməliyev bildirib.

Deputat qeyd edib ki, görüş, kifayət qədər konstruktiv şəraitdə keçdi və ikitərəfli əməkdaşlıq məsələləri müzakirə olundu:

"Hər iki dövlət Başçısı əvvəllər əldə olunmuş razılıqların icra vəziyyətinə, ticarətdə mal dövriyəsinin artmasına diqqət çəkməklə, münasibətlərin yüksələn templə inkişaf etdiyini bildirdilər. Cənab Prezident sentyabr ayının 12-dən 13-ə keçən gecə Ermənistanın sərhəddə törətdiyi genişmiqyası təxribatlardan sonra atəşkəs barədə razılığın əldə olunmasında Rusiyanın rolunu vurğuladı. Öz növbəsində Vladimir Putin, toqquşmaların Qarabağa aidiyyətinin olmadığını bildirdi.

Burada xüsusi diqqət çəkən məqam təxribatlardan sonra, Ermənistan baş naziri Nikol Paşinyan Kollektiv Təhlükəsizlik Müqaviləsi Təşkilatına müraciətində Qurumun dərhal müdaxiləsini tələb etdi. Lakin, Dövlət Başçılarının iştirakı ilə videoformatda keçirilən görüşdə gözlədiyi dəstəyi almadı. KTMT sadəcə, Ermənistana nümayəndə heyəti göndərməklə, başa saldı ki, sən hələ sərhədlərini müəyyənləşdirməmisən, qeyri-qanuni problemlərinı həll etmək üçün qoşun tələb edirsən. Bu isə, Mümkün olan məsələ deyil. Ələlxüsus, Ermənistanı çıxmaq şərtilə KTMT-a üzv olan ölkələrin hər birinin Azərbaycana, şəxsən Prezident İlham Əliyevə qarşı dostluq münasibətləri var. Ona görə də, lazımi dəstəyi almayan ermənilər, həm Rusiyadan, həm də digər müttəfiqlərindən küsdülər.

Deputat vurğulayıb ki, Ermənistanın yalvarışları ilə, Fransa prezidenti Makron BMT Təhlükəsizlik Şurasının təcili iclasını çağırdı:

Dünən keçirilən iclasda da ölkəmiz əleyhinə hansısa qətnamə, sənəd qəbul edilmədi. Bütün bunlar Azərbaycan diplomatiyasının qələbəsidir. Prezident İlham Əliyevin beynəlxalq nüfuzu, uzaqgörən, dəqiqliklə ölçülüb-biçilmiş siyasətinin nəticəsidir. Düşmən həm hərb meydanlarında, həm də diplomatik masada məğlub olubdur. Ermənistanın ən böyük problemi onun müstəqil dövlət olmamasında, havadarlarına arxalanaraq "maşa" rolunu oynamasında, eyni vaxtda müxtəlif stullarda oturmağa cəhd etməsində, haqq-ədaləti inkar etməsindədir. Haqq-ədalət isə, Azərbaycanın tərəfindədir".

Aysel Yusifqızı

Telegramda izləyin