"Tələbələrin ev probleminin günahkarı ERMƏNİLƏRdir" - Ekspert

Bildiyimiz kimi, Bakıda köhnə yaşayış binalarının söküntüsü ilə əlaqədar olaraq kirayə mənzil sahəsində ciddi qıtlıq yaşanır. Həm tələbələr, həm də sakinlər bu problemlə üzləşirlər.

Əmlak məsələləri üzrə ekspert Elnur Fərzəliyev BiG.AZ-a açıqlamasında bildirib ki, paytaxtda tələbə yataqxanalarının yetərincə olmaması bu problemlərə yol açır:

"Bu gün də tələbələrin ev probleminin günahkarı ermənilərdir. Çünki Birinci Qarabağ müharibəsinə qədər, demək olar ki, bütün ali təhsil müəssisələrinin və peşə məktəblərinin özlərinin yataqxanaları var idi. Müharibə başladıqdan sonra bütün məcburi köçkünlərimizin bir hissəsi həmin tələbə yataqxanalarına sığındılar və orada yaşadılar. Düzdür, çox hissəsi köçürülüb və evlə təmin olunub, amma yenə də yataqxanada qalan məcburi köçkünlərimiz yataqxanalara sığındığına görə tələbələr evsiz, yataqxanasız qaldılar.

Bu gün həmin yataqxanalar boşaldılıb, amma ora yaşayış üçün yararsızdır. Çünki hamısı qəzalı vəziyyətdədir. Başqa bir tərəfdən, həmin yataqxanalar boşaldılıb, məcburi köçkünlərin böyük hissəsi evlə təmin olunsa da, bu yataqxanaların özü bərbad vəziyyətdə olsa belə, yataqxanaların torpaq sahəsi, yerləşdiyi ərazilər var. Bu problemin aradan qaldırılmasının yeganə yolu ondan ibarətdir ki, həmin yerlərdə, köhnə yataqxana olan ərazilərdə yeni hündürmərtəbəli yataqxanalar tikilsin. Bu tədbirlər görülməlidir ki, tələbələrin ev problemi aradan qalxsın.

Zamanla Bakıda söküntü işləri gedir və bu proses davam edəcək. Paytaxtda 11 minə qədər istismar müddəti bitmiş binalar var. Ucuz kirayə mənzillər də bu binalarda olur. Bu proses də sürətlə getsə, köhnə binalar sıradan çıxdıqdan sonra, təbii ki, ucuz mənzillər olmayacaq. Hər sökülən köhnə binanın yerində yeni bina tikilir. Burada da mənzilin kirayə qiyməti yeni binada köhnə binadan iki dəfə bahadır. Bu isə tələbələri daha da çıxılmaz vəziyyətə salır. Bu baxımdan tələbələrin ev, yataqxana problemi həll olunarsa, ümumən paytaxt ərazisində kirayə problemi aradan qalxar. Yəni paytaxtda kirayə qalan tək tələbələr deyil, digər paytaxt sakinləri, ailəli insanlar da var. Qiymətlər də fantastik dərəcədə bahadır. Bu gün ən ucuz birotaqlı bina evinin kirayə qiyməti minimal əməkhaqqıdan çoxdur".

Ekspertin sözlərinə görə, tələbələrin ev probleminin həlli həm onların sosial durumuna, həm də kirayə bazarına müsbət təsir edəcək:

"Avropa ölkələrində bələdiyyələr tərəfindən tikilmiş sosial evlər var. Burada vətəndaşın sosial durumu aşağı düşərsə, o, bələdiyyəyə müraciət edir və bələdiyyələr həmin şəxsləri, ailələri sosial evlərə yerləşdirir. Bu evlərdə kirayə ödənişi yoxdur, sadəcə insanlar kommunal xərcləri ödəyirlər. Vətəndaşın sosial problemləri aradan qalxana qədər o həmin evdə qala bilir.

Bizdə də hər il bölgələrdən Bakıya minlərlə tələbə gəlir və bu, minlərlə evlərin kirayələnməsi deməkdir. Bu ailələrin içərisində sosial durumu aşağı olan aztəminatlı ailələr daha çoxdur. Təsəvvür edin ki, bölgədə yaşayan aztəminatlı bir ailə başçısının şəhərdə uşağının təhsil xərclərini qarşılaması, yəni illik ödənişi, kirayə pulu, yol xərci təxminən 300-400 manat civarındadır. Ən azından ev problemi aradan qalxarsa, bu ailələrin sosial vəziyyəti nisbətən yaxşılaşar. Digər tərəfdən, normativə görə, birotaqlı yataqxanada iki tələbə qalmalıdır ki, onlar rahat yaşaya və dərsləri ilə məşğul ola bilsinlər. Amma evlərin kirayə qiyməti o qədər bahadır ki, bir mənzildə bəzən 4-5 tələbə qalır. Bu da tələbələrin bir-birlərinə mane olmasına və digər problemlərə yol açır, dərs oxumasına, təhsillərinə birbaşa mənfi təsir göstərir".

Telegramda izləyin