Bu məşhur dərman alkoqolizmi müalicə edir - Alimlər

Yel Tibb Məktəbindən olan amerikalı alimlər ürək xəstəliklərinin müalicəsində istifadə olunan məşhur spironolakton dərmanının alkoqolizmə qarşı təsirli olduğunu müəyyən ediblər.

BiG.AZ lenta.ru-ya istinadən xəbər verir ki, araşdırmanın nəticələri "Molecular Psychiatry" jurnalında dərc olunan məqalədə əks olunub.
Əvvəlki araşdırmalarla açıqlanıb ki, beyindəki mineralokortikoid reseptorları bədəndəki maye və elektrolit balansını tənzimləməyə kömək edir, spirtli içkinin qəbulunda və asılılığında rol oynayır. Bu reseptorların daha məhsuldar işi alkoqol istehlakının artmasına səbəb olur. İndi mütəxəssislər spironolakton preparatından istifadə edərək mineralokortikoid reseptorlarının bloklanması üzrə təcrübələr aparmaq qərarına gəliblər.

Çox vaxt bu dermandan ürək problemlərinin və yüksək təzyiqin müalicəsində istifadə olunur. Tədqiqat zamanı bu dərman alkoqolizmi olan siçanlara tətbiq edilib. Nəticələr göstərib ki, spironolaktonun artan dozaları erkək və dişi heyvanlarda hərəkət və ya koordinasiya problemlərinə səbəb olmadan spirt qəbulunu azaldıb, həmçinin onların qida və su qəbuluna təsir göstərməyib.
Bundan əlavə, spironolakton qəbul edən alkoqolizm xəstələri üzərində əlavə meta-analiz aparılmışdır. Bu zaman alkoqol istifadəsinin azalması müəyyən olunub. Eyni zamanda, ən böyük təsir ağır xəstələrdə müşahidə edilib.

Telegramda izləyin