Çin ordunu müharibəyə hazırlaşmağa çağırdı

Çin Xalq Respublikasının sədri Si Cinpin hərbi qulluqçulara müharibəyə hazırlıqla bağlı çağırış edib. O, diqqəti hərbi əməliyyatlara hazırlığa yönəltməyi tapşırıb.

BiG.AZ xarici mətbuata istinadən xəbər verir ki, bu barədə Çin lideri Pekində milli müdafiə və hərbi islahatlara həsr olunmuş konfransdakı çıxışı zamanı deyib.

O vurğulayıb ki, son illər ölkə ordusu ciddi dəyişikliklərə məruz qalıb. Bildirilib ki, Çin ordusunun indi yeni sistemi, strukturu və hərbi geyim forması var.

"Uğurlu islahat təcrübəsini vicdanla yerinə yetirmək və tətbiq etmək, yeni situasiyaya yiyələnmək və tapşırıqların tələblərini başa düşmək, diqqəti müharibələrə hazırlaşmağa yönəltmək, həmçinin araşdırma və yeniliklər etmək üçün cəsarətə sahib olmaq lazımdır" – deyə Si Cinpin deyib.

Qeyd edək ki, bundan əvvəl ABŞ Çinin Asiya-Sakit Okean regionunda hərbi fəaliyyəti fonunda "Mavi Sakit okeanda tərəfdaşlar" anti-Çin qrupunun iclasını çağırıb. Tədbir 22 sentyabrda Nyu-Yorkda BMT Baş Assambleyası çərçivəsində Sakit Okean Adaları Sammitindən əvvəl baş tutacaq.
Xatırladaq ki, ABŞ və Çin arasında gərginlik Asiya-Sakit okean regionunda rəqabət fonunda son aylarda güclənib. Çin hakimiyyəti bölgədəki beynəlxalq suların əhəmiyyətli hissəsinin ÇXR-ə aid olduğunu bildirir. Söhbət Tayvan, Filippin, Vyetnam, Malayziya və digər ərazilərdə mübahisəli sulardan gedir. Çin hökuməti dünya ticarətinin keçdiyi dəniz yollarına nəzarəti artırmaq üçün addımlar atır.

Telegramda izləyin