"Ölkə başçımızın qurduğu düzgün strategiya bizi bu qələbəyə apardı" - Deputat

"Erməni havadarları Azərbaycana çox ciddi təzyiqlər göstərirdi. Prezident cənab İlham Əliyev bütün bunlara sinə gərməyi bacardı, hər birinin cavabını verdi. Azərbaycan təkcə döyüş meydanında qələbə qazanmadı, eyni zamanda informasiya, diplomatiya müstəvisində Ermənistana qalib gəldi. Beləliklə, Azərbaycan 44 günlük Vətən müharibəsində nəinki tarixi ədaləti bərpa etdi, eyni zamanda dünya erməni faşizminə, onların havadarlarına qalib gəldi".
Bu sözləri Milli Məclisin deputatı Cavid Osmanov Sonxeber.az-a bildirib.
O həmçinin qeyd edib ki,Azərbaycanın tarixi qələbəsinin kökündə müzəffər Ali Baş Komandan, xalq və silahlı qüvvələrin birliyi dayanırdı. Xalqımızın öz lideri Ali Baş Komandan ətrafında sıx birləşməsi, ordumuzun gücü, qətiyyəti, ölkə başçımızın qurduğu düzgün strategiya bizi bu qələbəyə apardı:

"Ermənilər 2 əsr boyunca Azərbaycan xalqına qarşı etnik təmizləmə və soyqırımlar törətmişdilər. Elə 90-cı illərin əvvəli birinci Qarabağ müharibəsində də Azərbaycan torpaqlarının 20 faizini işğal altına saldılar, Xocalı, Qaradağlı kimi ərazilərdə misli görülməmiş vəhşiliklərlə xalqımıza qarşı soyqırım törətdilər. Ermənistan bundan sonrakı mərhələdə çalışırdı ki, status-kvonu saxlasın və Azərbaycanı işğalla barışdırsın. Azərbaycan prezidenti Müzəffər Ali Baş Komandan cənab İlham Əliyevin rəhbərliyi ilə Azərbaycan güclü bir dövlətə çevrildi.İlk növbədə Azərbaycanın müstəqil iqtisadiyyatı quruldu, Azərbaycanın milli maraqlarına xidmət edən siyasət yürüdüldü və eyni zamanda Azərbaycanın güclü ordusu formalaşdırıldı.
Azərbaycan ordusu dünyanın 50 ən güclü orduları sırasına daxil oldu. Azərbaycan silahlı qüvvələrində vətənpərvər ruhda yetişən gənclərimiz oldu. Azərbaycan xalqının heç vaxt işğalla barışmayacağını hər zaman İlham Əliyev qeyd edirdi. Hətta Azərbaycan hər zaman çalışırdı ki, bu məsələ beynəlxalq hüquq normaları çərçivəsində, danışıqlar prosesində sülh yolu ilə həll olunsun. Amma Ermənistan bu məsələnin sülh yolu ilə həllini istəmirdi. Çalışırdı ki, köhnə status-kvonu saxlasın. BMT-nin Təhlükəsizlik Şurasının bununla bağlı 4 qətnaməsi var idi ki, Ermənistan silahlı qüvvələri Azərbaycan torpaqlarından qeyd-şərtsiz çıxsın. Ermənistan beynəlxalq hüquqa heç bir əhəmiyyət vermədən öz işğalçılıq siyasətini davam etdirirdi. Beynəlxalq bir riyakarlıq var idi, Ermənistana ciddi təsir göstərilmirdi ki, BMT-nin Təhlükəsizlik Şurasının 4 qətnaməsini həyata keçirtsin. Ermənistan cəzasız qaldığı üçün yenidən Azərbaycan torpaqlarını işğal etmək niyyətinə düşmüşdü. Belə ki, Ermənistanın keçmiş müdafiə naziri Tonoyan ABŞ-da erməni lobbisi ilə görüşü zamanı bəyan etmişdi ki, yeni torpaqlar uğrunda yeni müharibəyə hazırlaşır. Biz 2020-ci ilin 12 iyul tarixində Tovuz istiqamətində Ermənistanın başladığı təxribatlarda bunun əyani təzahürünü gördük. Digər tərəfdən 27 sentyabr 2020-ci il tarixində Ermənistan daha geniş miqyaslı təxribatlara başladı və bununla da yeni torpaqlar uğrunda müharibəyə başladılar. Azərbaycan prezidenti İlham Əliyevin rəhbərlərliyi ilə rəşadətli ordumuz əks hücum əməliyyatına başladı. Beləliklə də 44 gün ərzində Azərbaycan qüvvələri bir addım belə geri çəkilmədən ancaq irəliyə gedərək torpaqlarımızı işğaldan azad etdi.Erməni havadarları Azərbaycana çox ciddi təzyiqlər göstərirdi. Prezident cənab İlham Əliyev bütün bunlara sinə gərməyi bacardı, hər birinin cavabını verdi. Azərbaycan təkcə döyüş meydanında qələbə qazanmadı, eyni zamanda informasiya, diplomatiya müstəvisində Ermənistana qalib gəldi. Beləliklə, Azərbaycan 44 günlük Vətən müharibəsində nəinki tarixi ədaləti bərpa etdi, eyni zamanda dünya erməni faşizminə, onların havadarlarına qalib gəldi və 10 Noyabr tarixində Ermənistan diz çökərək kapitulyasiya aktına imza atdı.Azərbaycanın igid əsgər və zabitləri 44 günlük dastan yazdılar. Öz tarixinin ən parlaq zəfərini Azərbaycan xalqına yaşatdılar. Azərbaycanın tarixi qələbəsinin kökündə müzəffər Ali Baş Komandan, xalq və silahlı qüvvələrin birliyi dayanırdı. Xalqımızın öz lideri Ali Baş Komandan ətrafında sıx birləşməsi, ordumuzun gücü, qətiyyəti, ölkə başçımızın qurduğu düzgün strategiya bizi bu qələbəyə apardı".

Şəbnəm Lətifi

Telegramda izləyin