Yevlaxda Anım gününə həsr edilmiş tədbirlər keçirilib

Tədbir iştirakçıları Yevlax Şəhidlər Xiyabanında Şəhidlərin məzarlarını ziyarət etmiş, məzarların üzərinə gül dəstələri düzərək, müqəddəs xatirələrinə öz ehtiramlarını bildirmişlər. Sonra ağacəkmə aksiyası keçirildi.

Tədbir Bəşir Səfəroğlu adına Xalq Teatrında Yevlax şəhər Mədəniyyət Mərkəzinin əməkdaşları tərəfindən Anım gününə həsr edilmiş ədəbi-bədii kompozisiya nümayişi ilə davam etdirilmişdir.
Daha sonra "Təbiət" Şadlıq sarayında Şəhidlərin xatirəsinə ehsan süfrəsi açılmışdır. Yevlax Şəhər İcra Hakimiyyəti tərəfindən təşkil edilən ehsan süfrəsində şəhər icra hakimiyyətinin başçısı Anar Tağıyev, YAP Yevlax rayon təşkilatının, rayonun hüquq-mühafizə orqanlarının, "Yevlax Cümə" Məscidinin, Rayon Ağsaqqallar Şurasının, "Seyid Yusif Ağa" Ziyarətgahının rəhbərləri, Vətən müharibəsi şəhidlərinin ailələri, qazilər iştirak ediblər.

Əvvəlcə Xalqımızın Ümummilli Lideri Heydər Əliyevin və Azərbaycan Respublikasının ərazi bütövlüyü uğrunda canlarından keçən şəhidlərin xatirəsi bir dəqiqəlik sükutla yad edilib.
Ehsan mərasimi zamanı Şəhidlərin xatirəsinə həsr edilmiş sənədli film nümayiş etdirildi.

Yevlax Şəhər İcra Hakimiyyətinin Başçısı Anar Tağıyev çıxış edərək bildirib ki, Möhtərəm Prezident, Müzəffər Ali Baş Komandan Cənab İlham Əliyevin rəhbərliyi ilə Azərbaycan 44 günlük Vətən müharibəsində tarixi Qələbə qazandı, ədalət bərqərar oldu və bu gün şəhid olan övladların ruhları şaddır. Azərbaycan Respublikasının ərazi bütövlüyü uğrunda övladlarını itirən analara öz ehtiramını bildirərək, şəhidlərimiz kimi, onların analarının, ailələrinin də hər kəs üçün çox dəyərli olduqlarını diqqətə çatdırıb.

Qeyd edilib ki, Azərbaycan Respublikasının Prezidenti İlham Əliyev tərəfindən imzalanmış "Azərbaycan Respublikasında Anım Gününün təsis edilməsi haqqında" sərəncamına əsasən 27 sentyabr - Vətən müharibəsinin başladığı günün Azərbaycan Respublikasında Anım Günü kimi qeyd olunması Vətən Müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti, şəhid ruhlarına, şəhidlərin doğmalarına ali ehtiramın göstəricisidir.

Şəhər rəhbəri Birinci Vitse-Prezident hörmətli Mehriban xanım Əliyeva tərəfindən şəhid ailələrinə, məcburi köçkün ailələrinə, Qarabağ müharibəsi əlillərinə və veteranlarına göstərilən diqqət və qayğıdan danışıb. Qeyd edib ki, 44 günlük Vətən müharibəsində yaralanan qazilərimiz Heydər Əliyev Fondu tərəfindən yüksək texnologiyalı protezlərlə təmin olunurlar.

44 günlük müharibə Azərbaycan xalqının nə qədər vətənpərvər, böyük xalq olduğunu, milli birliyini, həmrəyliyini bütün dünyaya sübuta yetirdi. Həmin günlərdə Yevlax sakinləri də böyük vətənpərvərlik duyğuları nümayiş etdirdilər.

Yevlaxlılar tarixi Qələbənin qazanılmasında layiqli sözlərini dedilər. Ümumiyyətlə yevlaxlıların qəlbi hər zaman Qarabağla döyünüb.

2 il öncə yüzlərlə Yevlax sakini müzəffər Ali Baş Komandan İlham Əliyevin "İrəli" əmri ilə Qarabağ uğrunda savaşa atıldı. Könüllülərin sayı hesabı yox idi.
Yevlaxlı igidlər Suqovuşandan Şuşayədək qəhrəmanlıqla döyüşdülər. Qarabağın hər bir qarışında Yevlaxın igid övladlarının qanı var.

Həmçinin bildirdi ki, Şəhidlərimizin əziz xatirələri Yevlaxda da sonsuz ehtiram və hörmətlə yad edilir. Onların xatirələrinin əbədiləşdirilməsi, yaşadığı binaların qarşısında, oxuduğu məktəblərdə xatirə komplekslərinin, guşələrin yaradılması istiqamətində bir sıra işlər həyata keçirilmişdir və bu işlər bu gün də davam etdirilir.

Mərasimdə "Seyid Yusif Ağa" Ziyarətgahının rəhbəri Seyid Səbuhi Yusifov, Qafqaz Müsəlmanları İdarəsinin Qərb bölgəsi üzrə səlahiyyətli nümayəndəsi Hacı Tahir Abbasov və başqaları çıxış edərək şəhidlərin qəhrəmanlığından danışıb və tədbirin mahiyyəti haqqında fikir bildiriblər.

Ehsan süfrəsində həmçinin "Yevlax Cümə" Məscidinin imamı Hacı Eldəniz Əhmədov tərəfindən "Qurani-Kərim"dən ayələr oxunub, xalqımızın və dövlətimizin firavanlığı, əmin-amanlığı üçün dualar edilib.

Şəhid ailələri və qazilər öz çıxışlarında şəhidlərimizin əziz xatirələrinə, eləcə də şəhid ailələrinə və qazilərə göstərdikləri böyük qayğı və diqqətə görə möhtərəm Prezidentimiz İlham Əliyevə və Birinci Vitse-Prezident hörmətli Mehriban xanım Əliyeva dərin təşəkkürlərini bildiriblər.

Saat 12:00-da Yevlaxda şəhidlərin əziz xatirəsi bir dəqiqəlik sükutla yad olundu.

Telegramda izləyin