Ərdoğan və Paşinyanın görüşündən nə gözlənilir? - RƏY

Türkiyə prezidenti Rəcəb Tayyib Ərdoğan və Ermənistan baş naziri Rəcəb Tayyib Ərdoğan oktyabrın 6-7-də Praqada görüşəcək.
Görüşdə Ankara-İrəvan münasibətlərinin normallaşdırılması, o cümlədən xüsusi nümayəndələrin görüşlərinin üçüncü ölkələrdə yox, Türkiyə və Ermənistanda keçirilməsi müzakirə ediləcək.

Politoloq Elşən Manafov Sonxeber.az-a bildirib ki, tərəflər arasında müzakirəyə çıxarılacaq məsələlər ətrafında hər hansi ciddi razılıqların əldə ediləcəyi gözlənilən hal deyil:

"Praqada tərəflər arasında baş tutacaq göruşün perspektivdə səmərəsi Ermənistanin baş nazirinin sərgiləyəcəyi mövqedən asılı olacaq. Türkiyə regionda dayanıqlı sülh və sabitliyin bərqərar olması naminə 3+3 formatında əməkdaşlığın qurulması və genişləndirilməsinin zəruri olması mövqeyindən çıxış edir. Ermənistanla münasibətlərdə olan mövcud problemlərin həlli məqsədilə rəsmi Ankaranın irəli sürdüyü məlum şərtlər var ki, onlara əməl olunması danışıqlarda əldə edilə biləcək razılıqların təməl prinsiplərini təşkil edə bilər. Türkiyə Ermənistandan "Türkiyə Ermənistanı" kimi bədnam mövqedən imtina(1920-ci ilin Sevr muqaviləsindəki maddə), 1915-ci ilin hadisələrinin obyektiv araşdırılması və onlara qiymət verilməsi üçün ikitərəfli komissiyanın yaradılması, Azərbaycana olan ərazi iddialarından imtina, Qarabağın Azərbaycanın ayrılmaz tərkib hissəsi kimi tanınması, 2020-ci ilin üçtərəfli Moskva razılaşmasının şərtlərinin yerinə yetirilməsi və s. məsələlərə münasibətdə qəti və birmənalı mövqenin sərgilənməsini tələb edir. Azərbaycanla demarkasiya, habelə nəqliyyat kommunikasiya dəhlizlərinin açılmasını razılıq müqabilində Türkiyə də Ermənistanla 1993-cü ildən bağlı qalan sərhədlərin açılacağına təminat verməyə hazır olduğunu bildirir. Lakin Paşinyan iqtidarının son vaxtlar Azərbaycanı təxribata çəkmək məqsədi ilə təmas xəttində atəşkəs barədə razılığın şərtlərini kobud şəkildə pozması, ABŞ-ın sifarişi və tələbləri ilə danışıqları pozmaq üçün nümayişkəranə şəkildə etdiyi demarşlar, danışıqların danışıqlar naminə aparılması, qeyri-konstruktivlik və nəhayət Paşinyanın müstəqil qərar qəbul etməkdə acizliyi belə bir fikir söyləməyə əsas verir ki, tərəflər arasında müzakirəyə çıxarılacaq məsələlər ətrafında hər hansi ciddi razılıqların əldə ediləcəyi gözlənilən hal deyil".

Şəbnəm Lətifi

Telegramda izləyin