Beynəlxalq hüquq Xocavənddəki kütləvi məzarlığa görə Ermənistanı cəzalandıra bilər? - AÇIQLAMA

Xocavəndin Edilli kəndində kütləvi məzarlıq aşkar edilib. Qalıqlar Birinci Qarabağ müharibəsindən qalmış hərbçilərə aiddir.

Azərbaycanın qeyri-hökumət təşkilatları kütləvi məzarlıqla bağlı beynəlxalq təşkilatlara müraciət ünvanlayıb.

Beynəlxalq məhkəmələrlə işləyən hüquqşünas Əsabəli Mustafayev Sonxeber.az-a bildirib ki, Azərbaycan ekspertiza faktlarını toplayıb təqdim etsə, Beynəlxalq Cinayət Məhkəməsində qazanmaq şansı Avropa Məhkəməsindən daha çoxdur. Çünki qətl 90-cı illərdə baş verib, Azərbaycan isə konvensiyaya 2002-ci ildə qatılıb:

"Bütün beynəlxalq konvensiyalarda, o cümlədən Avropa Məhkəməsində insan həyatı qorunur. İnsanın həyatdan məhrum edilməsi qadağan olunub. Düzdür, bu hadisə 90-cı illərdə baş verib, biz isə 2002-ci ildə konvensiyaya qoşulmuşuq. Avropa Məhkəməsinin bu müddətə necə yanaşacağı məlum deyil. Bu, indiyə kimi davam edən cinayətdir. Ölüm hadisəsi baş verib və araşdırılma aparılmayıb. Təşəbbüskarlar müəyyən olunumayıb və məsuliyyətə cəlb olunmayıb. Güman edirəm ki, Avropa Məhkəməsinin müddət keçəndən sonra baxılma məsələsi yoxdur. Bizim Beynəlxalq Cinayət Məhkəməsində uğur qazanmamıza daha çox şans var. Beynəlxalq Məhkəmə kütləvi cinayətə baxır. Bu, bəşəriyyət əleyhinə olan cinayət kimi qiymətləndirilə bilər. Hər halda hökumət hər iki instansiyadan istifadə etməyə cəhd etməlidir. Mən əminəm ki, uğur qazanmaq şansı böyükdür. Beynəlxalq Cinayət Məhkəməsinin Yuqaslaviya ilə bağlı işləri olub və kütləvi qətl törədən şəxslər cəzalandırılıb.Artıq belə bir praktika var və bu daha səmərəli yoldur. Çünki həmin məhkəmə cəzanı özü təyin edir. Avropa Məhkəməsində isə belə imkan yoxdur. Ona görə də hesab edirəm ki, hökumət sübutları toplamalı, ekspertiza nəticəsində məlum olan faktları məhkəməyə təqdim etməlidir. Azərbaycanın bu işdə uğur qazanmaq şansı çox böyükdür. Birincisi, bu qətlin bəşəriyyət əleyhinə cinayət kimi tanınması bizi maraqlandırır. İkincisi, kompensasiyaların ödənməsidir . Həmin şəxslərin ailələrinə, vərəsələrinə kompensasiyaların ödənilməsi çox vacibdir".

Şəbnəm Lətifi

Telegramda izləyin