"NATO Ukraynaya müdaxilə etsə, bu, qlobal fəlakətə gətirib çıxara bilər..."

Putin qlobal fəlakətə gətirə biləcək şərti açıqlayıb...

"Rusiya Ukraynada müharibəni başlamasaydı, daha əlverişsiz vəziyyətdə olacaqdı..."

"Rusiyadan gedənlərə emosional deyil, hər bir konkret halda hüquqi qiymət verilməlidir..."

"Baydenlə danışıqlar üçün hələlik platforma yoxdur..."

Rusiya prezidenti bəyan edib ki, Ukraynanı məhv etmək fikri yoxdur və NATO-ya müdaxilə etməmək barədə xəbərdarlıq edib...

Rusiya prezidenti Vladimir Putin oktyabrın 14-də Astanada jurnalistlər qarşısında Qazaxıstana səfərinin yekunları ilə bağlı çıxış edib.

Bu barədə "Vesti" nəşri yazıb.

O, deyib ki, "heç nədən təəssüflənmir" və öz hərəkətlərini düzgün hesab edir.

O, Rusiyada səfərbərlik, Ukrayna ilə müharibə, NATO ilə mümkün qarşıdurma və başqa məsələlərə toxunub.

Rusiya prezidentinin sözlərinə görə, səfərbərlik iki həftədən sonra bitəcək, artıq bu günə 220 min adam səfərbər edilib.

"Əlavə heç nə planlaşdırılmır. Müdafiə nazirliyindən bununla bağlı heç bir təklif daxil olmayıb. Yaxın gələcəkdə mən buna heç bir zərurət görmürəm", - Putin əmin edib.

Rusiyadan gedənlər barədə Putin hesab edir ki, "burada emosional deyil, hər bir konkret halda hüquqi qiymət vermək daha doğru olar".

Ukrayna musiqisini dinlədiyinə görə bir Moskva sakininin 15 sutka həbs edilməsi barədə danışan Putin deyib: "Biz hər hansı mədəniyyəti qadağan edənlərə bənzəməməliyik, mədəniyyətin buraya, ümumiyyətlə, aidiyyəti yoxdur".

Daha sonra Putin xəbərdarlıq edib ki, əgər Krım körpüsünü partlatmaq üçün partlayıcı maddənin Odessadan taxıl daşıyan gəmi ilə gətirilməsi təsdiq edilərsə, Rusiya taxıl dəhlizini bağlayacaq.

Daha sonra Rusiya prezidenti bəyan edib ki, onun ölkəsi "həmişə danışıqlar üçün açıqdır".

O, Ukrayna hakimiyyətini danışıqlar aparmaq istəyinin olmamasında ittiham edib.

"Onlar həmişə deyir ki, danışıqlar aparmaq istəyirlər, indi isə rəsmən belə danışılları qadağan edən qərar qəbul ediblər. Burada nədən danışmaq olar ki?"- Putin deyib.

Putin ABŞ prezidenti Co Baydenlə danışıqlara bel bağlamır. Onun sözlərinə görə, "Baydenlə danışıqlar üçün hələlik platforma yoxdur...Mən, düzünü desəm, buna böyük mənada zərurət görmürəm".

O, G20 sammitinə gedəcəyini bilmədiyini əlavə edib.

Daha sonra Putin yenidən özünün belə nəzəriyyəsini təkrarlayıb ki, onun ölkəsi Ukraynada müharibəni başlamasaydı, daha əlverişsiz vəziyyətdə olacaqdı.

"Mən istəyirəm aydınlıq gətirəm. Bu gün baş verənlər, yumşaq desək, az xoşagələndir. Lakin biz bunlara sonradan özümüz üçün daha pis şərtlərlə sövq ediləcəkdik, vəssalam", - o, deyib.

Rusiya prezidenti bəyan edib ki, qarşısına Ukraynanı məhv etmək kimi vəzifə qoymayıb.

"Bu gün Ukraynadakı obyektlərə güclü zərbələrə ehtiyac yoxdur. Hələlik, onları tədricən məhv edirik, sonra vəziyyətə baxacağıq".

O, əlavə edib ki, NATO qoşunlarının Ukraynaya yeridilməsi və Rusiya ordusu ilə birbaşa toqquşması, belə bir şey baş verəcəyi halda, çox təhlükəli addım olacaq, "bu da qlobal fəlakətə gətirib çıxara bilər".

"Ümid edirəm ki, bu barədə danışanların belə təhlükəli addımların atılmasına yol verməmək üçün ağlı-dərrakəsi kifayət edəcək", - o, xəbərdarlıq edib./Moderator

Telegramda izləyin