"Ermənistan və havadarlarının təxribatları bizi qorxutmur, əksinə, tarixi torpaqlarımıza daha da yaxınlaşdırır" - DEPUTAT

"44 günlük Vətən müharibəsi bizim şərəf tariximiz, qürur mənbəyimizdir".

Bunu Sonxeber.az-a açıqlamasında Ana Vətən Partiyasının (AVP) sədri, deputat Fəzail Ağamalı deyib.

Depuatatın sözlərinə görə, 200 ildən çoxdur ki, ermənilər və onları himayə edən havadarlar azərbaycanlıları tarixi torpaqlarından vəhşicəsinə, soyqırımlar törədərək qovub, işğalıçıları yerləşdirərək qondarma Ermənistan dövləti yaradıblar:

"Ermənilər Vətən müharibəsinə qədər torpaqlarımızı işğal edərək öz vandallıqlarını ortaya qoyublar. Təəssüf ki, 90-cı illərin əvvəllərinə qədər məlum səbəblərə görə ermənilərin torpaqlarımızı işğal etməsinin qarşısını ala bilməməmişik. 44 günlük Vətən müharibəsində Ali Baş Komandan 17 il ərzində qurduğu orduyla, formalaşdırdığı vətənpərvər cəmiyyətlə və qəhrəman zabit-əsgərlərimizlə ermənilərin növbəti genişmiqyaslı hərbi əməliyyatlarının qarşısını alaraq, 30 illik işğala son qoyub torpaqlarımızı azad etdi. 44 gün ərzində nəinki torpaqlarımız azad edildi, həm də 30 ildə ermənilərin uydurduqları "Yenilməz Ermənistan" ordusu mifi darmadağın edildi. Biz Vətən müharibəsində xalq və dövlət olaraq gücümüzü dünyaya göstərdik. Ermənistan və havadarları anladı ki, Azərbaycanla oyun oynamaq olmaz. Bu gün Azərbaycan 90-cı illərin əvvələrindəki kimi gücsüz və başsız deyil. Əlbəttə, bu qələbənin baş memarı Ali Baş Komandan İlham Əliyevdir. Vətənpərvər gənclərimizin axıtdığı qan və verdiyi can hesabına biz artıq dünyada qalib xalq, diqtəedən güclü dövlət statusunu qazandıq. Biz, əlbəttə, qürur duyuruq. Hazırda proses davam edir. Ermənistan ordusunun tör-töküntüləri hələ də Qrabağ, Xankəndi və ətrafındadırlar. Eyni zamanda, Rusiyanın sülhməramlıları da oradadır. 10 noyabrda imzalanan üçtərəfli bəyanatda göstərilib ki, sülhməramlılar məsələsinə baxılacaq. Əminəm ki, cənab Preizidentin mahir diplomatik qabiliyyəti hesabına növbəti illərdə nəyinki bu problemə son qoyulacaq, hətta sülhməramlıların Azərbaycandan gedişinin şahidi olacağıq".

Deputat təəssüflə vurğulayıb ki, bu gün ermənilər hələ də təxribatlarına davam edirlər:

"Onlar müxtəlif yollarla, məkirli planları ilə çirkin niyyətlərini reallaşdırmağa çalışırlar. Məqsəd də ermənilərin Qarabağda hər hansı bir statusla qalmasını təmin etməkdir. Baxmayaraq ki, son vaxtlar ermənilər "Arsax"la bağlı bizi narahat edən bəyanatlar səsləndirmirlər, amma əməllərində onlar təxribatlarından geri qalmır, Ermənistan-Azərbaycan sərhədindəki hərbçilərimizə, mülki vətəndaşlarımıza atəş açırlar. İtkilərimiz və yaralılarımız da olur. Erməni terrorçuların bütün təxribatlarının qarşısı Azərbaycanın Müzəffər Ordusu tərəfindən alınır və şəhidlərimizin qanı yerdə qalmır. Sonuncu təxribatları zamanı biz 80 yaxın şəhid versək də, Ermənistanın rəsmi açıqlamasına görə, onlar 220-yə yaxın itki veriblər. Amma qeyri-rəsmi məlumata görə, onlarda 400-dən çox ölən, 500-dən çox yaralanan oldu. Ermənilər bu genişmiqyaslı təxribatlarının cavabını ağır alsalar da, ağıllanmaq istmirlər. Yenə də bütüm sərhəd boyu, xüsusilə Daşkəsən, Tovuz və Gədəbəy istiqamətində təxribatlarını davam etdirirlər. Bu gün Ermənistan başqa hiyləyə əl atıb. Onlar Qerblə, xüsusilə də Fransa ilə əlaqələrini sıx quraraq müxtəlif təxribatlar törədirlər. Fransanın son zamanlar aktivləşməsi göz önündədir. Xüsusilə də Makronun açıqlamasından da göründüyü kimi, Fransa cəmiyyəti tamamilə erməniləşib. Makronun sonuncu müsahibəsi analoqu olmayan sərsəmləmə xarakterli açıqlama idi. O, prezident kimi, nəinki öz ölkəsini, hətta bütün dünyanı yalanları ilə aldatmağa çalışır. Bunlara baxmayaraq, Azərbaycanın güclü lideri və ordusu, eləcə də Türkiyə kimi dost, qardaş müttəfiqləri var. Ermənistan və havadarlarının təxribatları bizi qorxutmur, əksinə, tarixi torpaqlarımıza daha da yaxınlaşdırır. Burada vətəndaş kimi bizim də üzərimizə böyük öhdəlik düşür. Biz bu gün Prezident İlham Əliyevin, ordumuzun ətrafına daha da sıx birləşməli, qəhrəman hərbçilərimizi daim dəstəkləməliyik".

Aysel Yusifqızı

Telegramda izləyin