"İstər sülhməramlı, istər separatçılar qanunsuz əmələ görə cavab verməlidirlər" - Deputat

"Rusiya sülhməramlılarının öz peşə vəzifəsini yerinə yetirən jurnalistlərin fəaliyyətinə maneçilik törətmələri qanunsuzdur və onların mandatları ilə uzlaşmır".

Bunu Sonxeberə.az-a danışan deputat Nəsib Məhəməliyev bildirib.

Deputat qeyd edib ki, normal məntiqlə, çəkiliş üçün şərait yaradılmalı, jurnalistləri maraqlandıran sualları cavablandırmalı idilər:

"Deməli, nəyisə gizlədirlər. Qeyri-qanuni fəaliyyətlərinin Azərbaycan ictimaiyyətinin bilməsində maraqlı deyillər. Bu, təbii ki, özbaşınalıqdır və onların rəhbərliyinin nəzərinə çatdırılmalıdır".

Deputat vurğulayıb ki, son günlər, sülhməramlıların yaratdığı şəraitdən istifadə edən separatçılar yenidən təşkilatlanır, əraziyə İran əsilli diversantlar cəlb olunur, təbii sərvətlərin talançılığı ilə məşğul olurlar:

"Cəzasızlıq mühiti müddətsiz davam edə bilməz. İstər sülhməramlı, istər separatçılar, kimliyindən asılı olmayaraq, törətdikləri qanunsuz əmələ görə cavab verməlidirlər. Azərbaycan əvvəlki dövlət deyil, öz hüquqlarını, milli və dövlət maraqlarını müdafiə etmək iqtidarındadır".

Aysel Yusifqızı

Telegramda izləyin