"Avropa İttifaqı Şurasının bu qərarı Azərbaycan-Ermənistan münasibətlərini yenidən gərginləşdirə bilər"- DEPUTAT

"Avropa İttifaqı (Aİ) Şurasının qərarını Azərbaycana qarşı növbəti təxribat kimi də dəyərləndirmək olar ".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 30 ərzində Azərbaycana qarşı ikili münasibət olub:

"44 günlük Vətən müharibəsindəki möhtəşəm qələbəmizi həzm etməyən bəzi dövlətlər və təşkilatlar qərəzli mövqe sərgiləməklə regionda gərginlik yaratmaq istəyirlər. Onlar müxtəlif qərar və qətnamələrlə Azərbaycana qarşı təzyiq göstərməyə çalışırlar.

Avropa İttifaqı (Aİ) Şurasının Ermənistanda monitorinq missiyasının yaradılması işğalçını dəstəkləyən növbəti addımdır. Avropa İttifaqı (Aİ) Şurasının bu qərarı ikitərəfli əsasda həyata keçirilməli olan sərhədlərin delimitasiyası prosesi də daxil olmaqla Azərbaycan və Ermənistan arasında normallaşma prosesinə xələl gətirmək məqsədi daşıyır".

Deputat vurğulayıb ki, 30 il ərzində işğala göz yuman və bir dəfə də olsa Ermənistana qarşı hər hansı təzyiq göstərməyən təşkilatlar bu gün hansı beynəlxalq hüquqdan danışırlar:

"İkinci vacib məsələ Avropa İttifaqı (Aİ) Şurası bu qərarı ilə Qarabağdakı terrorçuları qorumağa çalışmasıdır. 2020-ci ilin 10 noyabrında imzalanan üçtərəfli bəyannaməyə görə erməni silahlı birləşmələri Qarabağdan çıxarılmalı idi. İki ildən çox vaxt keçsə də imzalanan üçtərəfli bəyannamənin şərtləri Ermənistan tərəfindən tam icra olunmayıb. Belə bir zamanda Avropa İttifaqı (Aİ) Şurasının Ermənistanda monitorinq missiyasının yaradılması Qarabağda hələ də gizlənən terrorçulara təxribatlar üçün yeni imkanlar yarada bilər. Nəticədə də bu Azərbaycan-Ermənistan münasibətlərinin yenidən gərginləşməsinə gətirib çıxaracaq".

Aysel Yusifqızı

Telegramda izləyin