"İran-İsrail münaqişəsində Azərbaycan öz tərəfində olmalıdır" - Zərdüşt Əlizadə

"İran-İsrail münaqişəsində Azərbaycan öz tərəfində olmalıdır. İsrail-İran qarşıdurmasının Azərbaycana dəxli yoxdur. Azərbaycan öz təhlükəsizliyi barədə düşünməlidir ki, müharibə gəlib Azərbaycana çıxmasın.Bizim İranla bölə bilmədiyimiz nə var? Xırda-para narazılıqlar genişmiqyaslı ola bilməz".

Bu sözləri politoloq Zərdüşt Əlizadə Sonxeber.az-a Azərbaycan-İran-İsrail münasibətlərini şərh edərkən deyib.

O bildirib ki, Azərbaycanın İrandakı Səfirliyinə hücum və İsrailin İranın hərbi bazasına dron hücumunun ard-arda olması təsadüfdür. Səfirliyə hücumun şəxsi səbəbdən olması da istisna deyil.

"Azərbaycanın İrandakı səfirliyi bir müddət bağlı qalacaq. Məsələ aydınlaşandan sonra açılacaq. İsrail çoxdan İrana qarşı hücumu planlaşdırırdı. Azərbaycan səfirliyinə hücumla İsrailin İranın hərbi bazasına dron hücumu ilə bağlı əlaqə görmürəm. Bununla bağlı heç bir sübut yoxdur.İranın iddia etdiyi kimi ailə münaqişəsi olması istisna edilmir. İstintaqın nəticəsini gözləməliyik.
Bəzi hallarda hansısa hadisədən siyasi məqsədlər üçün sui-istifadə etməyə çalışırlar. Xatırlatmaq istəyirəm ki, Gəncənin Elmar Vəliyev adlı icra başçısı var idi. Oğurluq edən, vətəndaşlara nifrət edən bir adam idi. Prezident Aparatına onunla bağlı yüzlərlə şikayət gedirdi. Heç kim məhəl qoymurdu. Sonra bir bədbəxt onu öldürdü. Bu hadisəyə "terror aktı" adı qoyub siyasi don geyindirdilər. Şayiə yayıldı ki, ona bu tapşırığı başqa dövlətlər verib. Lakin hamının bildiyi bir məsələ var idi : Zalım məmur, xalqa verilən zülm və ondan qisas alınması.
Azərbaycan Səfirliyi də 9 aydır həmin şəxsi qəbul etmirdi. Ola bilər ki, səbəb bu olsun.Hər halda istintaq gedir. Nəticəni gözləməliyik" ,- deyə politoloq qeyd edib.

İstiqamət: Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi

Material Azərbaycan Respublikasının

dəstəyi ilə hazırlanmışdır.

Şəbnəm Lətifi

Telegramda izləyin