Leyla Əliyevadan şəkərsiz, amma şirin PİROQ RESEPTİ - FOTO

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva növbəti paylaşımıyla diqqət çəkib.

BiG.AZ xəbər verir ki, o, şəxsi "İnstagram" səhifəsində aşpaz Metin Kadık ilə birlikdə hazırladığı "Sevgi. Şəkərsiz, amma şirin" kitabından "Avokado piroqu" reseptini bölüşüb.

Hazırlamaq istəyənlər üçün həmin resepti təqdim edirik:

Avokado piroqu

Hazırlama vaxtı:
20 dəqiqə
Porsiyaların sayı:
12 ədəd

Enerji dəyəri (bir porsiya üçün)
Kkal: 245
Yağ: 14,4 q
Karbohidrat: 7,5 q
Protein: 3,8 q
Təbii şəkər: 8,1 q

Lazım olanlar:

İçi üçün:
240 q qovurulmuş keşyu
70 q quru kokos tozu
80 q xurma
5 q vanil ekstraktı
30 q laym suyu
10 q kokos şəkəri
1 q duz
1 q stevia tozu

Üstü üçün:
450 q avokado
50 q laym
7 q sürtgəcdən keçirilmiş laym qabığı
70 q aqava şirəsi
5 q vanil ekstraktı

Hazırlanması:
1-ci addım: Mətbəx kombaynına keşyu, tumlarını çıxardığınız xurmaları, quru kokos tozunu, kokos şəkərini, stevia tozunu, vanil ekstraktını və duzu əlavə edərək ehmallıca qarışdırın. Bişirmədən hazırladığınız bu təamın yetərincə bərk olması vacibdir. Qarışımı yağlı kağıza bərabər şəkildə yayın.
2-ci addım: Piroqun üstü üçün nəzərdə tutduğunuz avokadonu bir qabda əzin. Laym qabığını, laym suyunu, aqava şirəsini və vanil ekstraktını əlavə edin. Bütün bu inqrediyentləri yaxşıca qarışdırın.
3-cü addım: Avokado əzməsini piroqun üzərinə yayın.
4-cü addım: Piroqu soyuducuda saxlayın. Süfrəyə gətirməzdən 15 dəqiqə öncə soyuducudan çıxarın və bərabər hissələrə bölüb qaba düzün.

Qeyd edək ki, "Sevgi. Şəkərsiz, amma şirin" adlı kitabın təqdimatı dekabrın 28-də Bakı Kitab Mərkəzində baş tutub. Leyla Əliyeva və Metin Kadıkın müəllifi olduqları bu kitabda yer alan xeyirli və ləzzətli təamlar qonaqlara təqdim olunub. Bu reseptlərin əsas xüsusiyyəti onların şəkərsiz olmasıdır. Reseptlərin hər biri kitabda Leyla Əliyevanın şeirlərindən parçalar ilə müşayiət olunub. Kitab Bakı Kitab Mərkəzinin bilavasitə iştirakı ilə "Şərq-Qərb" nəşriyyatında çap olunub. Musiqili-poeziya gecəsində həmçinin "Söz" ədəbi layihəsinin iştirakçıları gənc pianoçuların müşayiəti ilə öz şeirlərini ifa ediblər.

Telegramda izləyin