"Hər zaman olduğu kimi Azərbaycan bu gün də qardaşını pis günündə tək qoymadı" - DEPUTAT

"Təəssüf ki, bu gün qardaş Türkiyənin müxtəlif bölgələrində baş vermiş zəlzələ nəticəsində ölənlərin sayı durmadan artmaqdadır".

Bunu Sonxeber.az-a danışan deputat Cavanşir Paşazadə bildirib.

"Bu saata olan rəsmi məlumata görə qardaş Türkiyənin cənub-şərqində 7.7 gücündə baş verən zəlzələ nəticəsində 912 nəfər ölüb, 5385 şəxs yaralanıb. 2 min 470 nəfər dağıntılar altından xilas edilib. 2 min 818 bina isə dağılıb. Ölən və yaralıların sayının artması gözlənilir. Zəlzələ nəticəsində dünyasını dəyişənlərə Allahdan rəhmət, yaralananlara isə şəfa diləyirəm. Hər zaman olduğu kimi yenə də Azərbaycan qardaşını pis günündə tək qoymadı. Cənab prezidentin verdiyi tapşırığa əsasən ilkin olaraq Fövqəladə Hallar Nazirliyinin 370 nəfərdən ibarət çevik xilasetmə qüvvələrinin qardaş ölkəyə yola düşməsi üçün hazırlıq işlərinə başlanılıb. Bundan əlavə ilkin yardım məqsədilə çadırlar, yataq dəstləri, tibbi ləvazimatlar və digər zəruri vasitələri hadisə yerinə çatdıracaq ikinci təyyarə də hazırlanır və ən qısa zamanda onun göndərilməsi nəzərdə tutulur. İnanıram ki, tezliklə qardaş Türkiyə bu ağır sınağı da arxada qoyacaq və zəlzələ baş verən bölgələrdə həyat yenidən öz axarına qayıdacaq".

Aysel Yusifqızı

Telegramda izləyin